قلب راجل
زهراء بدموع: — قولتله والله يا أمي، قولت لجدي إني مش عاوزة ورث ولا عاوزة حاجة، بس هشام لا، ده إنسان مش أمين، ده بيكلمني يا أمي ونظراته وكلامه بتخوفني، إزاي أتجوزه بس إزاااي؟! بس جدي مش فارق معاه أي حاجة غير الفلوس وورث ولاده وبس.
وداد بحيرة: — أنا بس مش عارفة هنعمل إيه وهنروح فين يا زهراء، إحنا مالناش حد غير خالك ومسافر برة مصر، وكفاية على الظابط جاسر كده، إحنا تقلنا عليه أوي وشيلناه هم مش همه.
زهراء ودموعها بتزيد: — عارفة يا أمي، بس بإيدينا إيه؟! بصي، أنا هتكلم معاه وأقوله إنه يساعدنا نسافر إسكندرية، وهناك نبدأ من جديد وكده كده مالناش حد هناك، يعني جدي مش هيشك إننا روحنا هناك أصلاً.. إيه رأيك؟
وداد بعقل: — إحنا هنبقى نجدنا آه، بس سيبنا ورانا الهم كله لحضرة الظابط جاسر، أكيد جدك مش هيسيبه خصوصاً بعد ما يعرف إنكم متجوزتوش ولا حاجة.
زهراء بحزن: — عندك حق يا أمي.. بس طب هنعمل إيه؟
وداد بتنهيدة: — سيبيها على ربنا، وإن شاء الله ربك هيحلها من عنده.
كان جاسر واقف بيعدل هدومه لما دخلت عليه جيهان أمه، اللي باين عليها الغرور من طريقتها.
جيهان بابتسامة: — اممم.. ده أنا قولت إنك نايم بما إنك يعني إجازة.
جاسر بابتسامة: — أنا فعلاً إجازة، بس عندي مشوار مهم لازم أروحه يا ماما.
جيهان بتكشيرة: — نعم؟! مشوار إيه بقى ده؟ إوعى تتأخر على معادنا بليل يا جاسر وتحرجني مع خالتك نادين.
جاسر بضيق: — يا ماما حضرتك عارفة إني مش هحضر حتى لو كنت فعلاً إجازة، وبعدين أنا قولتلك رأيي بمنتهى الصراحة وإني مش موافق على الجوازة دي، فياريت متضغطيش عليا لأني مش حابب أزعلك مني.
جيهان بانفعال: — يعني إيه يا جاسر؟! أنت عاوز تحرجني مع الناس؟ وبعدين لحد إمتى هتفضل عازب؟! أنا عاوزة أفرح بيك يا حبيبي.
جاسر بتلقائية: — أولاً أنا مقولتش لحضرتك تعزميهم، ثانياً أنا مش موافق على نيرة لشخصها أولاً وده لأنها متفتحة زيادة عن اللزوم، وثانياً لأن حضرتك مش عاوزاني أتجوز عشان عاوزة تفرحي بيا زي ما بتقولي، لا.. أنتِ عاوزة تضمني بس فلوس جوز خالتي مش أكتر ولأن هو ده اللي يهمك، وأنا بقى في الحالتين مش موافق يا أمي.
جيهان بغضب: — أنت اتجننت يا جاسر؟! بترفض عشان أسبابك التافهة دي؟! وإيه يعني البنت منفتحة وبتلبس براحتها، أومال عاوزها تلبس إيه.. طرحة مثلاً؟!