المهر المزيف رشا خالد
قلت دق بعنف: — ليه؟ ردت: — عشان نوال تسمع صوتي.
رفعت عيني ناحية حماتي. كانت بتقرب مني. والبنت قالت: — يلا يا ملك… خليها تسمعني.
ضغطت على زر السبيكر. نوال وقفت قدامي. قلت: — اتكلمي.
ساد الصمت ثانيتين، ثم خرج صوت البنت من الموبايل قدام نوال: — مساء الخير يا طنط نوال… وحشتك دينا؟
الكوباية اللي كانت في إيد نوال… وقعت على الأرض.
دينا. الاسم لوحده كان كفاية يخلي وش محمود يتسحب منه الدم. جري ناحيتي وقال: — اقفلي المكالمة يا ملك! بعدت الموبايل عنه: — ليه؟ خايف من إيه؟ نوال صرخت: — البنت دي كدابة! اقفلي يا ملك، دي عايزة تخرب البيت!
ضحكة دينا طلعت من الموبايل: — لسه زي ما إنتِ يا طنط نوال… أول ما تتزنقي، اللي قدامك يبقى كداب وعايز يخرب البيت. محمود زعق: — دينا! إنتِ عايزة إيه؟!
صوتها اتغير: — ولا عايزة منك حاجة يا محمود. وسكتت لحظة قبل ما تكمل: — الحاجة الوحيدة اللي كنت عايزاها منك أخدتها من زمان… إني أعرف حقيقتك.
بصيت لمحمود، وبعدين سألت: — إنتِ عرفتي منين موضوع فلوسي؟ دينا قالت: — عشان الشقة اللي دفعوا فيها فلوسك… سكتت. — كانت المفروض تبقى شقتي أنا ومحمود.
بصيت لعقد الحجز اللي على موبايلي. اسم دينا كان فعلًا موجود عليه. قالت: — أنا ومحمود كنا مخطوبين سنتين. الشقة دي أنا اللي لقيتها، وأنا اللي دفعت أول مبلغ لحجزها من تحويشة شغلي. محمود قاطعها: — ما تكبريش الموضوع، المبلغ كان بسيط! صرخت دينا: — بسيط؟! وبعدين ضحكت بمرارة: — عارف إيه اللي كان بسيط فعلًا؟ إني صدقتك.
القاعة كلها كانت ساكتة، حتى المعازيم بقوا بيسمعوا المكالمة. دينا كملت: — قبل فرحنا بأربع شهور، محمود بدأ يطلب مني أحط كل فلوسي في الشقة. كل مرة يقولي إحنا هنعيش فيها سوا، يبقى مفيش فلوسي وفلوسك. وأنا صدقته، حولتله جزء كبير من تحويشتي. نوال صرخت: — كدابة! دينا ردت فورًا: — التحويلات البنكية عندي يا طنط نوال.
نوال سكتت. دينا كملت: — وبعدها بأسبوع اكتشفت إن عقد الشقة اتغير. بصيت للعقد مرة تانية: — واتكتب باسم نوال؟ — بالظبط. محمود قال: — عشان الإجراءات كانت أسهل! دينا ضحكت: — دي كانت نفس الجملة اللي قولتهالي.
وبعدين صوتها بقى أهدى: — لما اعترضت، طنط نوال قالتلي بالحرف: اللي داخلة عيلتنا ما تسألش الفلوس باسم مين. أمي بصت لنوال بصدمة. دينا قالت: — طلبت فلوسي وقلت إني مش هكمل الجواز قبل ما حقي يرجع. بعدها بيومين… سكتت. قلت: — حصل إيه؟ — محمود فسخ الخطوبة.
