طلب عجيب حكايات صافي هاني
لكن الغريب إن وش البنت كان متشال من الصورة كأنه حد تعمد يمحيه بالكامل
اتجمدت مكاني وأنا ماسكة الصورة
قربتها من وشي أكتر
واضح إن حد فعلًا كشط ملامح البنت بأداة حادة
لكن فستانها كان واضح
والقاعة كانت نفس القاعة اللي خطيبي قال لي إننا هنحجزها لفرحنا
كان فيه ورقة تانية في الظرف
فتحتها بسرعة
مكتوب بخط إيد
لو انتي بتقري الرسالة دي يبقى غالبًا لسه مصدقة إن المشكلة كلها في النظافة
لكن الحقيقة إن النظافة مجرد اختبار
أما السبب الحقيقي فهو أخطر بكتير
أنا كنت مخطوبة لآدم قبلك
وفي آخر أسبوع اكتشفت السر
ولما رفضت أكمل الجواز قالوا لكل الناس إني عندي مشاكل نفسية
وقطعوا علاقتهم بيا
بقيت أقرا كل كلمة وأنا إيدي بتترعش
آخر الرسالة كان فيها عنوان كافيه صغير وميعاد
الساعة خمسة
من غير ما يعرف حد
قضيت اليوم كله بفكر
أروح
ولا أعتبرها واحدة بتحاول تخرب علاقتنا
قبل المعاد بنص ساعة لبست ونزلت
فضلت أبص ورايا طول الطريق
كان عندي إحساس إن حد بيراقبني
دخلت الكافيه
كانت ست في آخر الأربعينات قاعدة في الركن
أول ما شافتني وقفت
وقالت
أخيرًا جيتي
قعدت قدامها
أول سؤال سألته
إنتي مين بجد
ابتسمت وقالت
اسمي أميرة
وأنا فعلًا كنت مخطوبة لآدم
قبلك بسبع سنين
قلت بسرعة
ليه فسختي
تنهدت وقالت
عشان رفضت أعيش تحت سيطرة أمه
افتكرت كلام خطيبي
قلت
هو قال إن الموضوع كله قواعد نظافة
هزت راسها وقالت
يا ريت كان كده وبس
في الأول هيقولولك استحمي مرتين
بعدها هيقولولك غيري هدومك كل ما تدخلي البيت
بعدها ممنوع تزوري أهلك غير بإذن
بعدها ممنوع تخلفي غير لما أمه توافق
وبعدها هتلاقي نفسك بتستأذني تشربي كوباية مية
حسيت إني مش قادرة أتكلم
قالت
أول سنة هيعاملك كويس
لأنه بيكون خايف تخافي وتمشي
لكن بعد الجواز كل حاجة بتتغير
قلت لها
يعني آدم موافق على ده كله
بصتلي بحزن
آدم مش وحش
بس عمره ما عرف يقول لأ لأمه
هي اللي بتقرر
وهو بينفذ
سكتت شوية
وبعدين فتحت شنطتها
طلعت دفتر صغير
وقالت
ده كان يومياتي وقت الخطوبة
اقري آخر صفحة
فتحتها
كان مكتوب
النهارده قالت لي حماته المستقبلية إن مفتاح شقتي لازم يفضل معاها عشان تطمن علينا في أي وقت
ولما رفضت قالت إن البنت اللي تخبي حاجة عن جوزها وأهله متستحقش تدخل العيلة
