طلب عجيب حكايات صافي هاني
قفلت الدفتر وأنا مخضوضة
قلت
طب يمكن تكون اتغيرت
ضحكت ضحكة قصيرة وقالت
أنا كنت بقول نفس الجملة
وبعدين طلعت موبايلها
وفتحت فيديو
قالت
بصي
كان الفيديو من كاميرا باب شقة
أمه واقفة قدام باب شقة واحدة ست
وبتفتح الباب بمفتاح
ودخلت من غير ما تخبط
بعد دقيقة خرجت وهي شايلة شنطة هدوم
قلت بدهشة
دي مين
ردت
دي مرات ابنها الكبير
كانت ساعتها عند أهلها
وأمها دخلت تفتش الشقة كلها
فضلت باصة للفيديو وأنا مصدومة
وفجأة موبايلي رن
كان آدم
رديت
قال بصوت متوتر
إنتي فين
قبل ما أرد سمعت صوت أمه من وراه وهي بتقول بعصبية
قولها ترجع حالًا
وقولها كمان إن الست اللي قاعدة معاها كذابة
بصيت لأميرة
اتفاجئت إنها وشها اتغير فجأة
وبصت من إزاز الكافيه ناحية الشارع
وقالت بصوت واطي
متبصيش دلوقتي
بس العربية السودة اللي واقفة بقالها عشر دقايق
دي عربية آدم
وفيها مش آدم لوحده… فيها أمه كمان
وكانوا باصين علينا من أول ما قعدنا
أول ما قالت الجملة دي حسيت جسمي كله ساقع
غصب عني بصيت ناحية الإزاز
لقيت العربية فعلًا واقفة
وآدم قاعد مكان السواق
وأمه جنبه
كانت عينيها متثبتة علينا بطريقة خلتني أحول وشي بسرعة
قالت أميرة
قلتلك متبصيش
هما بيحبوا يحسسوا أي حد إنهم شايفينه طول الوقت
بعد ثواني موبايلي رن تاني
رفضت المكالمة
بعدها وصلتني رسالة من آدم
لو سمحتي ارجعي البيت وأنا هشرحلك كل حاجة
بعدها بثانية رسالة تانية
متسمعيش كلامها
هي بتنتقم مننا
أميرة ابتسمت وقالت
ابعتي له إنك ماشية
بس متقوليش رايحة فين
عملت كده فعلًا
بعد أقل من دقيقة العربية اتحركت بسرعة
لكن بدل ما تمشي
وقفت قدام باب الكافيه
ونزلت أمه
دخلت بخطوات ثابتة
ولأول مرة شفتها بعيدة عن الابتسامة المصنعنة
وقفت قدام الترابيزة وقالت
خلصتي كلامك
أميرة بصتلها من غير خوف
وقالت
لسه
قالت أم آدم
مش هتبطلي تخربي حياة الناس
ردت أميرة
أنا اللي بخرب ولا اللي بيخدع البنات قبل الجواز
الناس كلها في الكافيه بدأت تبص علينا
أم آدم حاولت تمسك إيدي
وقالت
يلا يا بنتي
تعالي معايا
متسمعيش كلام واحدة مريضة
سحبت إيدي بهدوء
وقلت
أنا هسمع من الطرفين
وساعتها هقرر
وشها اتغير
وقالت لأول مرة بنبرة حادة
إحنا في عيلتنا مفيش حد بيجادل الكبار
أميرة طلعت ظرف تاني من شنطتها
وحطته قدامي
