اسيرها
نفخ إيهاب بضيق وقال: مـاتت ايه يا أما ما هي بتتنفس اهي…
بصتله امه بغيظ وسابت كوباية الميا ومسكت شبشبها وفضلت تضرب فيه وهي بتزعق فيه: ما كله منك يا موكوس يا عبيط يا ابن العبيطة… كل ده بسببك… انت جلاب المصايب… عمرك ما دخلت بحاجة عدلة ولا كيلو عنب حتي… دايماً بتدخل بالمشاكل والهم منك لله.. ودلوقتي داخلي بواحدة الله اعلم جايبها من فين، الحمدلله أننا ساكنين في حته بعيدة ومفيش جيران لينا قريبين والا كنا اتفضحنا…
يا امي لسه بتضربيني بالشبشب؟ عيب كده انا بقا عندي تلاتين سنة…
مسكت أمه ودانه وقالت: واضربك لحد ما تكمل الخمسين يا روح امك… كبرت عليا يا واد…
مسك ايهاب ايديها وقال: اضربيني يا ستي براحتك بس بيني وبينك مش قدام الناس، برستيجي يا حاجة…
برستيج مين يا معفن… هو انت عرفت الكلمة دي من فين.. انت بتتكبر عليا يا واد؟ مش كفاية جيبتلي جثة البيت وضربت صاحب الشغل… أنا قولت هتشتغل وحالك هيتعدل روحت تعمل مشكلة تاني، مفيش فايدة فيك…
الله يا امي اومال اسيب الراجل يعتدي عليها؟
ضربت أمه كف علي كف وقالت: انا معرفش انت ليه وشك فقر كده، كل ما تروح شغلانة تتطرد منها، زي مكتب المحاماه اللي روحته واتخانقت مع صاحب المكتب… أنت مش بتعمر في اي شغلانة ليه.. عايزة اعرف ليه!!!
عشان أصحاب الشغل مبقاش عندهم نخوة ولا ضمير.. المحامي المحترم اللي اشتغلت عنده كان بيتحرش بواحدة قد بناته شغالة عنده، اسكت يعني…
لا ازاي، جيبلنا مصيبة كل مرة… اهو جبت جثة معاه..
ششش يا امي الجثة بتتحرك… اقصد البنت بتتحرك…
فتحت عيني بتعب لقيت قدامي الشاب اللي انقذني وواحدة تانية معاه… وفجأة صرخت برعب فصرخوا هما… قومت وشيلت البطانية اللي مغطيني بيها وقولت: انتوا مين!
بطلوا صراخ، وقالت الست: ابني جابك من فيلا الباشا اللي كان هيعتدي عليكي… وبعدين مسكت البطانية وغطتني وقالت: استري نفسك يا ضنايا اصل ابني عينيه زايغة…
شدت البطانية حواليا وقعدت علي السرير وانا بعيط جامد… قعدت جمبي الست وقالت: قوليلي يا حبيبتي ايه حكايتك!
بصيت لها وقررت احكيلها كل حاجة من اول حبي للؤي لحد ما أجبرني ابقي مع شريكه…
