اسيرها
نسرين!!!
صوت بابا خرجني من شرودي.. قومت ودموعي بتنزل لوحدها… كنت مكسوفة منه ومترددة اني أقرب منه بس هو فتح دراعه وانا جريت وحضنته وانا بعيط بحرقة وبقول: اسفة… اسفة…
كنت بعتذر كتير…. بعتذر منه اني مسمعتش كلامه… اني كسرت كلمته وانا في الاخر اللي خسرت… عرفت أن اهلي دايماً علي حق..
بعدت عنه شوية وقولت: عرفت ازاي يا بابا…
وصلي الخبر وجيت علطول… ايه اللي حصل بالتفصيل… أنا كل اللي سمعته ان واحد قتل لؤي عشان يدافع عنك… وانا جيبت محامي ممكن بقا تقولي اللي حصل بالتفصيل…
هزيت راسي وانا بقوله بإختصار اللي حصل… بعد ما خلصت ابويا وشه احمر من الغضب: الحقير الواطي… أنا كنت اعرف أنه حقير بس أنه يكون عديم الرجولة والجبان، كويس أنه مات والا كنت قتلته مليون مرة…
بصلي وقال: سامحيني يا بنتي اني اتخليت عنك… سامحيني.. مكانش مفروض ابعد واتخلي عنك… حتي لو كنتي كسرتي كلمتي كان لازم افضل واتأكد أنه مش هيعملك حاجة ولا يغلط.. بس انا… أنا…. وبعدين دموعه نزلت…
مسحت دموعه وانا بعيط وبقول: مش غلطتك… غلطتي أنا يا بابا…
مسحت دموعي وكملت وقولت: موقف إيهاب الشاب اللي ساعدني حلو اووي يعني مش هيتحاكم اصلا بس هو لسه جوا وانا قلقت بصراحة…
انا داخل مع المحامي وهشوف الوضع ومتقلقيش عليه…
خرج ايهاب من الموضوع بسهولة… كان ابويا واقف وماسك ايدي وهو بيشكر ايهاب علي وقفته معايا: انا لو شكرتك من هنا للصبح مش هوفي حقك… يا بني انت أنقذت حياة بنتي…
انا معملتش حاجة… اي حد مكـ… قالها ايهاب بإحراج بس بابا قاطعه وقال: لا محدش هيحط نفسه ووالدته في خطر عشان واحدة غريبة… محدش بيعمل كده يا بني، متقللش من قيمة اللي عملته واسمحلي اني احاول ارد ولو جزء من الجميل… أنا عرفت انك من غير شغل دلوقتي بعد ما قبضوا علي جلال كمان بسبب محاولة اعتدائه علي بنتي وكمان علي موظفة في شركته قدرت تدينه…
اتحرج إيهاب اكتر وقال: يا بيه والله ربنا كريم، أنا هلاقي شغل بإذن الله…
ربنا كريم فعلا ويمكن هو عشان كريم بعتلك الفرصة دي… تعالي انت والوالدة معايا القاهرة أنا هوفرلكم سكن وشغل ليك كمان… لو سمحت مترفضش….
