اتجوزت وفيق اماني سيد

قصة: اتجوزت وفيق بقلم: أماني السيد اتجوزت وفيق بعد قصة حب دامت تلات سنين في الجامعة، كان داخل على طمع متغلف بحنية مسمومة، وأنا من سذاجتي كنت فاكرة إن كرمي معاه جدعنة وبنت أصول. ورثت عن والدي عمارة كاملة ومحل تجاري كبير في موقع حيوي، ومن أول يوم فتحتله خزينتي على مصراعيها؛ غيرتله عربيته المتهالكة بأحدث موديل، وجهزتله شركة المقاولات اللي كان بيحلم بيها من الألف للياء، وكنت بدفع إيجار الفيلا الفخمة اللي عايشين فيها ومصاريف أكلنا وشربنا وخدمنا، وهو كل ما يمسك قرش يرميه في حساباته الخاصة ومارينا ومضارباته اللي مبشوفش منها مليم أحمر. بعد سبع سنين جواز، الحلم الوحيد اللي اتكسر بينا هو العيال. دخلنا في دوامة تحاليل ودكاترة وعمليات حقن مجهري فاشلة هدّت حيلي، لحد ما الدكتور حسمها بجمود: "مخزون البويضات ضعيف جداً، ونسبة الحمل تكاد تكون معدومة". يومها وفيق مسك إيدي بتمثيل متقن، وحط راسه في كتفي وقال بدموع تماسيح ترن في الأذن: ـ إنتي عندي بالدنيا وما فيها يا نيرة، العيال بتيجي وتروح، لكن إنتي النفس اللي عايش بيه.. مستحيل حاجة تفرقنا أبداً. مسافة ست شهور بالظبط، ولقيت الوش التاني بيتشد عليه. دخل عليا نص الليل، لابس كاجوال وشعره مصفف بزيادة، وقف في البلكونة يدخن سيجارته بعين باردة. روحت وقفت جنبه وسألته بحنية: ـ مالك يا وفيق؟ سارح في إيه؟ لف وشه وبصلي بنظرة خالية تماماً من أي رحمة أو عشرة، وقال بنبرة قاطعة زي حد السيف: ـ نيرة، أنا راجل وعايز اسمي يفضل عايش، عايز عيل يشيل اسم وفيق بعد ما أموت. ـ طب ما إحنا لسه بنحاول يا وفيق، والطب كل يوم فيه جديد.. قاطعني ببرود يرعب: ـ الطب جاب آخره وإنتي عارفة.. عشان كده أنا قررت، وكتب كتابي الخميس الجاي على واحدة تانية. الكلمة نزلت على نفوخي زي مية مغلية، بس فجأة حسيت بحاجة اتمسحت من جوايا للأبد؛ لا عيطت، ولا صرخت، ولا بان عليا أي انكسار. بلعت الوجع، ورسمت على وشي ابتسامة هادية جداً، وسألته: ـ ومين سعيدة الحظ دي يا وفيق؟ وهتصرف عليها منين والفيلا دي بمصاريفها بتبلع ألوفات كل شهر؟ ضحك باستهزاء وغرور مالي وشه وقال: ـ متقلقيش، ريم بنت بسيطة وصغيرة ورضيت بالظروف عشان عارفة قيمتي، هتقعد معانا هنا في جناح الضيوف الكبير اللي في الدور التاني، والفيلا تساعنا وتساع عيالنا، ومرتبك وإيراد المحل هيكفونا ويزيدوا.. مش إنتي برضه روحك فيا وعايزة راحتي؟ هزيت راسي بهدوء تام: ـ طبعاً يا وفيق.. راحتك هي أهم حاجة. ومن اللحظة دي، وفيق فلتت منه كل فرامل الخجل والحياء. بدأ يجهز الجناح الملكي لعروسة الغفلة، سحب من الحسابات المشتركة، وجاب أفخم مفروشات وأحدث أجهزة، واشترى شبكة ألماظ ودفع كل مليم كان مخبيه من ورايا، وكل ده عشان يبهرها. كان طول اليوم تليفونه في الشاحن، يبتسم للشاشة برعونة مراهق، ويغمزلي وهو نازل يقابلها ويقول: "ادعيلي يا أصيلة، البيت الجديد محتاج دعواتك!". جه يوم الخميس، ودخل وفيق ماسك في إيد "ريم".. بنت في أول العشرينات، عيونها بتبص للنجف والسجاد والتحف بنظرة طمع وانتصار رخيص، وتبصلي باستعلاء كأنها كسبت الجائزة الكبرى. من تاني ليلة، التبجح بقى عيني عينك. وفيق بقى يصحى من النجمة، ينزل يجيب الفطور الفندقي ويدخلهولها على صينية فضة لحد السرير، ولو لقى علبة عصير ناقصة من التلاجة يدخل يزعق في وشي: ـ إنتي مستخسرة تجيبي الفاكهة والمكملات اللي ريم بتحبها؟ البنت رقيقة وجسمها ضعيف ومحتاج تتغذى كويس عشان الحمل! كنت أرد ببرود ثلجي: ـ حقك عليا يا وفيق، من عينيا كل اللي تطلبه ست البنات. الموضوع وصل لقمه الاستفزاز لما نزلوا يقضوا العصرية في البيسين في الجنينة، ضحكاتها المايعة كانت مالية المكان، وكان يجري وراها في الماية ويشيلها ويلف بيها قدام عيني وأنا قاعدة على الترابيزة بشتغل على اللاب توب. طلعت من الماية لابسة روب قصير، وجت وقفت فوق راسي بدلع وقالت وهي بتعدل شعرها المبلول: ـ ميرسي أوي يا طنط نيرة على العصير الفريش.. وفيق قايلي إنك ست بيت شاطرة جداً وهتريحيني في موضوع المطبخ ده خالص عشان أفضى للبيبي اللي جاي. وفيق جه من وراها وحضنها من وسطها وبصلي بانتصار وتبجح: ـ طبعاً يا حبيبتي، نيرة عاقلة وفاهمة الأصول، وعارفة إن دورها دلوقتي ترتاح وتتفرج على البيت وهو بيتملي بالحيوية بدل الكآبة اللي كانت خانقانا سنين. بصيت لعينيه الاتنين اللي كانت بتبصلي بتحدي، وأخدت رشفة من قهوتي الباردة، وابتسمت ببرود هز ثقتهم في نفسهم للحظة، وقولت: ـ البيت هينور بيكوا يا حبايبي.. اتهنوا وافرحوا على الآخر، الجو شكله هيقلب حر أوي الأيام الجاية. تاني يوم الصبح، صحيت بدري عن عادتي، وبدل ما أنزل أواجههم على الفطار، دخلت مكتبي وقفلت الباب عليا. فتحت اللاب توب وبدأت أراجع حساباتي بهدوء. أنا طول السنين اللي فاتت كنت بعتبر فلوس وفيق فلوسي، وفلوسي فلوسه، وعشان كده كنت سايبة له مساحة يتحرك من غير ما أسأله عن كل جنيه. لكن دلوقتي… الموضوع انتهى. فتحت ملفات الشركة والعقود والتحويلات، وبدأت أراجع كل حاجة باسمي. بعد حوالي ساعتين، لقيت حاجة خلتني أبتسم لأول مرة من قلبي. شركة المقاولات اللي كنت فاكرة إني جهزتها لفيق من فلوسي، كانت كل أصولها وعقودها الأساسية متسجلة باسمي أنا. وفيق كان مجرد مدير وشريك إداري. رفعت عيني عن الشاشة وقلت لنفسي: ـ يا ترى يا وفيق… لو عرفت الحقيقة دي هتفضل عايز اسمي يفضل عايش؟ في نفس اللحظة، خبط حد على الباب. كان وفيق. دخل من غير ما يستنى ردي، وقال بضيق: ـ نيرة، ريم عايزة تنزل تشتري حاجات للبيبي، اديني الكارت بتاع الحساب. بصيت له بهدوء: ـ أنهي كارت؟ اتنرفز: ـ كارت الحساب المشترك طبعاً. ـ الحساب المشترك اتقفل. سكت. ـ نعم؟ ـ سمعتني. اتقفل من امبارح. قرب مني وقال بعصبية: ـ إنتي بتلعبي معايا؟ ضحكت ضحكة خفيفة: ـ لأ يا وفيق، أنا لأول مرة بلعب لوحدي. ـ نيرة! أنا جوزك! بصيت له في عينه وقلت: ـ وإنت اخترت تبقى جوز ريم من الخميس اللي فات. وشه اتغير. ـ إنتي ناوية تعملي إيه؟ قفلت اللاب توب ووقفت: ـ ولا حاجة دلوقتي. أنا بس بدأت أرتب حياتي. خرج وهو بيخبط الباب وراه. وبعد أقل من ساعة، سمعت صوت ريم في الصالة وهي بتصرخ: ـ يعني إيه الكارت مرفوض؟! وفيق رد عليها: ـ اهدى يا ريم. ـ أهدى إزاي؟ إنت قلتلي إن كل حاجة هنا تحت إيدك! ـ هتصرف. ـ تصرف منين؟! وقفت عند أول السلم وسمعت باقي كلامهم. ريم قالت بغضب: ـ إنت قولتلي إن نيرة ملهاش لازمة وإن كل اللي هنا بتاعك! سكت وفيق. ابتسمت، واضح إن أول شرارة بدأت تولع. نزلت بهدوء، ولما شافوني سكتوا. ريم بصتلي وقالت بسخرية: ـ إنتي اللي قفلتي الحساب؟ ـ أيوه. ـ وبأي حق؟ رديت عليها بمنتهى الهدوء: ـ بحقي. وفيق تدخل: ـ نيرة، بلاش فضايح. إحنا أهل في الآخر. بصيت له وقلت: ـ أهل؟ ضحكت: ـ أنت بنفسك قولت إنك عايز عيل يشيل اسمك. دلوقتي أنا عايزة حاجة واحدة بس… أشيل اسمي من كل حاجة تخصك. ريم قربت من وفيق وهمست: ـ هي بتتكلم عن طلاق؟ سمعتها، قلت: ـ أيوه. وفيق اتجمد مكانه، وبعدين قال بصوت منخفض: ـ إنتي مش هتطلقي. ـ ليه؟ ـ لأنك بتحبيني. ابتسمت لأول مرة من غير أي وجع: ـ كنت بحبك يا وفيق… لكن الحب اللي بيتبني على استغلال عمره ما كان حب من الأساس. وقبل ما يمشي، رميت قدامه ملف على الترابيزة. ـ ده كشف بكل الأموال اللي اتصرفت من حساباتي على شركتك وعلى بيتك الجديد وعلى ريم. فتح الملف، وشه اصفر. قلت: ـ بكرة الساعة عشرة الصبح، المحامي بتاعي هيكون هنا. سألني بصوت مرتجف: ـ والمحامي هيعمل إيه؟ ـ هيشرحلك إنت كنت عايش في بيت مين… وبتصرف من فلوس مين… ومين اللي هيخرج من هنا. ريم بصت له بخوف. ولأول مرة من يوم ما دخلت البيت، شفت الرعب الحقيقي في عيون وفيق. لكن اللي هو ما كانش يعرفه… إن الملف اللي قدامه كان مجرد البداية. لأن اللي اكتشفته في حساباته الخاصة كان أخطر بكتير من موضوع الخيانة… اكتشفت إن وفيق كان مخبي عني سر من سبع سنين. وسر لو خرج للنور… مش هيهدم جوازنا بس، ده كان هيهدم حياته كلها. تاني يوم الساعة عشرة بالظبط، كان المحامي بتاعي قاعد في الصالون ومعاه اتنين من موظفين الشركة. وفيق دخل وهو عامل نفسه ثابت، لكن أول ما شاف الأوراق قدامه، ملامحه اتبدلت. المحامي قال بهدوء: ـ أستاذ وفيق، قبل ما نبدأ إجراءات الانفصال، في شوية مستندات لازم حضرتك تشوفها. وفيق بصلي: ـ نيرة، إنتي بتعملي إيه؟ رديت: ـ بعمل اللي كان لازم أعمله من سبع سنين. فتح المحامي ملف تاني وحطه قدامه. ـ دي مستندات تحويلات مالية من حسابات حضرتك لحسابات خارجية، ودي مبالغ خرجت من الشركة من غير مستندات واضحة. وفيق بلع ريقه: ـ أنا كنت بسحب من فلوسي. ضحكت بسخرية: ـ فلوسك؟ المحامي فتح ورقة وقال: ـ الشركة مسجلة باسم السيدة نيرة بنسبة الأغلبية، وحضرتك مدير فقط. وبالتالي أي تصرف مالي من غير موافقة رسمية منها ممكن يعرضك للمساءلة. ريم كانت واقفة عند باب الصالون، ووشها بدأ يصفر. فجأة قالت: ـ يعني إيه؟! وفيق لف لها: ـ ريم، اطلعي فوق. ـ لأ! أنا عايزة أفهم! إنت قولتلي إن الشركة بتاعتك وإنك هتأمن مستقبلي! رديت عليها بهدوء: ـ مستقبلك كان مبني على فلوسي يا ريم. صرخت: ـ إنتي السبب! ضحكت: ـ أنا؟ أنا اللي اتجوزت راجل متجوز؟ سكتت. وفيق ضرب بإيده على الترابيزة: ـ كفاية! المحامي قال: ـ لسه في نقطة أهم. بصيت له. فتح ظرف بني وطلع منه مجموعة أوراق. ـ دي نتيجة البحث المالي اللي طلبتيه يا مدام نيرة. أخدت الورق، وأول سطر خلاني أتجمد. حساب باسم امرأة. مش ريم. امرأة تانية تماماً. بصيت لوفيق: ـ مين دي؟ وشه اتغير: ـ مفيش حد. ـ يبقى ليه بتحول لها فلوس كل شهر من سبع سنين؟ سكت. ريم قربت منه: ـ سبع سنين؟! وفيق حاول يتكلم: ـ نيرة، الموضوع مش زي ما إنتي فاهمة. قلت: ـ أمال زي إيه؟ المحامي حط ورقة تانية قدامه: ـ السيدة دي بتستلم مبالغ شهرية ثابتة، وفي تحويلات باسم مستشفى وأطباء وتحاليل. قلبي دق بسرعة: ـ تحاليل؟ وفيق نزل عينه في الأرض: ـ أيوه. ـ ليه؟ سكت فترة طويلة، وبعدين قال جملة واحدة: ـ عشان كان لازم أعرف الحقيقة قبل ما أسيبك. بصيت له بعدم فهم: ـ حقيقة إيه؟ رفع عينه لأول مرة، وكان الخوف واضح فيها: ـ إنتي فاكرة إن الدكتور قال إن مخزون البويضات عندك ضعيف؟ هزيت راسي. قال: ـ الدكتور ده كان بيشتغل معايا. حسيت الأرض بتتحرك تحت رجلي: ـ يعني إيه؟ ـ يعني التقرير اللي شوفتيه من سبع سنين… مش تقريرك الحقيقي. سكت البيت كله، ريم نفسها مبقتش بتتكلم. قربت خطوة منه وقلت: ـ إنت بتقول إيه يا وفيق؟ قال بصوت مكسور: ـ التقرير الحقيقي كان بيقول إن فرصتك في الحمل كانت كويسة جداً. شهقت: ـ وإنت عرفت؟ ـ عرفت. ـ وخبيت عليا؟ ـ أيوه. ـ ليه؟! ما ردش. قربت منه وأنا لأول مرة أحس إن كل اللي عشته معاه كان كذبة واحدة كبيرة: ـ ليه يا وفيق؟! فضل ساكت، لحد ما ريم صرخت: ـ رد عليها! وفي اللحظة دي، المحامي فتح آخر ورقة وقال: ـ فيه سبب تاني حضرتك لازم تعرفيه… والسبب ده متعلق بالسيدة اللي في التحويلات. بصيت له: ـ مين هي؟ المحامي بص لوفيق. وفيق قفل عينيه وقال بصوت يكاد لا يُسمع: ـ أمي. اتجمدت: ـ أمك؟! هز راسه: ـ أيوه. ـ وفلوس سبع سنين كانت بتروح لأمك ليه؟ رد: ـ لأنها كانت عارفة كل حاجة. سألته: ـ عارفة إيه؟ رفع عينه لي: ـ عارفة إن الدكتور كذب عليكي… وعارفة السبب الحقيقي اللي خلاني أعمل كده. وقتها حسيت إن في سر أكبر من الخيانة والفلوس. سر لو اتكشف… هيخليني أندم إني وثقت في وفيق من أول يوم. لكن اللي ما كنتش أعرفه إن أمه كانت جاية في نفس اللحظة على باب الفيلا… وفي إيدها ظرف قديم عليه اسمي. ولما دخلت وشافتني، قالت: ـ خلاص يا نيرة… هو مش هيقدر يخبي أكتر من كده. فتحت الظرف قدامي. وأول ما شفت اللي جواه… حسيت إن قلبي وقف. فتحت الظرف بإيد بتترعش، وطلعت منه ورقة قديمة عليها ختم المستشفى وتاريخ يرجع لسبع سنين. بصيت لأول سطر، وبعدها للتاني، وكل كلمة كنت بقراها كانت بتسحب مني نفس. كان مكتوب بوضوح إن نتائج التحاليل الأصلية بتأكد إن حالتي كانت تسمح بالحمل، وإن مفيش أي تقرير طبي قال إن فرصي “تكاد تكون معدومة”. رفعت عيني ناحية وفيق: ـ يعني أنا كان ممكن أخلف؟ حماتي نزلت عينيها وقالت: ـ أيوه يا بنتي. حسيت دموعي نزلت لأول مرة من غير ما أقدر أمنعها: ـ وإنتوا عملتوا فيا كده ليه؟ وفيق حاول يقرب، لكني رجعت خطوة: ـ متقربش. قال بصوت ضعيف: ـ نيرة، اسمعيني بس. صرخت فيه: ـ أسمع إيه؟! أسمع إنك حرمتني من حلم عمري؟! سبع سنين وأنا فاكرة إن جسمي هو السبب! حماتي بدأت تعيط وقالت: ـ أنا اللي ضغطت عليه. بصيت لها: ـ ليه؟ سكتت شوية، وبعدين قالت: ـ لأن وفيق كان عليه ديون كبيرة من أول سنة جوازكم، وكان عايز يضمن إن فلوسك تفضل تحت إيده. ضحكت وأنا بعيط: ـ فلوسي؟ ـ أيوه. ـ يعني كل كلامه عن الحب والعيال كان تمثيل؟ حماتي ما ردتش. وفيق قال: ـ في الأول لأ. بصيت له: ـ يعني إيه في الأول؟ ـ في الأول كنت بحبك فعلاً… لكن لما عرفت حجم ثروتك، اتغيرت. وطمعي كبر. سكت البيت كله. كمل: ـ ولما الدكتور قال إنك ممكن تخلفي، خفت إنك لو حملتي يبقى كل حاجة هتتأمن ليكي ولابنك، وأنا هفقد السيطرة على فلوسك. بصيت له بعدم تصديق: ـ فكدبت عليا. ـ أيوه. ـ وفضلت سبع سنين تخليني أكره نفسي وأعمل عمليات وأدفع فلوس على علاج أنا أصلاً مش محتاجاه؟ هز راسه: ـ أيوه. ضحكت وسط دموعي: ـ عارف إيه أكتر حاجة توجع؟ سكت. ـ إنك لما كنت بتحضني وتقوليلي “إنتي بالدنيا”، كنت مصدقاك. نزل راسه: ـ أنا غلطت. ـ لأ يا وفيق. إنت ما غلطتش… إنت خططت. وفجأة ريم اتكلمت من وراهم: ـ يعني أنا اتجوزتك عشان تخلف مني وتاخد فلوسها؟ بص لها وفيق، لكنه ما عرفش يرد. ريم بدأت تعيط: ـ إنت قولتلي إنك بتحبني وإنك اخترتني عشان أنا مختلفة عنها! رديت عليها بهدوء: ـ إنتي كمان اتضحك عليكي يا ريم. لفت ناحيتي: ـ يعني إيه؟ ـ لأنك كنتي فاكرة إنك داخلة على راجل غني… لكن الحقيقة إن معظم اللي في إيده مش ملكه. المحامي تدخل وقال: ـ وده مش كل شيء. طلع ملف جديد: ـ بعد مراجعة حسابات الشركة، اكتشفنا إن أستاذ وفيق عليه التزامات مالية ضخمة، وفيه مبالغ اتسحبت من أموال الشركة من غير موافقة قانونية. وفيق اتوتر: ـ إنتي كنتي بتدوري ورايا من إمتى؟ قلت: ـ من اللحظة اللي قررت فيها تتجوز واحدة تانية في بيتي. المحامي كمل: ـ وبناءً على المستندات دي، حضرتك تقدري تستردي جزء كبير من الأموال اللي خرجت من الشركة بشكل غير قانوني. وفيق قرب مني: ـ نيرة، بالله عليكي متوصليش الموضوع للشرطة. بصيت له طويلاً: ـ فاكر لما قلتلي إنك عايز اسمك يفضل عايش؟ هز راسه. ـ أنا مش هقت/ل اسمك يا وفيق. ابتسم بأمل، لكن ابتسامته اختفت لما كملت: ـ أنا بس هسيبك تعيش بالاسم اللي إنت اخترته لنفسك. طلعت من شنطتي ورقة، حطيتها قدامه: ـ دي ورقة الطلاق. اتجمد مكانه: ـ إنتي مستحيل تعملي كده. ـ عملتها. ـ نيرة، أنا هخسر كل حاجة! بصيت له بهدوء: ـ لأ. وقفت قدامه وقلت: ـ إنت خسرتني من سبع سنين… النهارده بس أنا عرفت. وبعدين بصيت لريم: ـ وإنتي يا ريم، عندك اختيار واحد بس. قالت بخوف: ـ إيه؟ ـ تخرجي من بيتي قبل ما تلاقي نفسك داخلة في قضية معاه. بصت لوفيق، وفيق بص لها، ولأول مرة، الاتنين اكتشفوا إن مفيش بينهم أي حب. كان بينهم مصلحة وبس. ريم شالت شنطتها وطلعت تجري على السلم. أما وفيق، فضل واقف قدامي عاجز. لكن قبل ما يخرج، حماتي نادت عليه: ـ استنى. لف لها. قالت: ـ في حاجة نيرة لسه متعرفهاش. بصيت لها باستغراب: ـ إيه كمان؟ حماتي فتحت شنطتها وطلعت صورة قديمة، مدتها لي. بصيت للصورة… كانت صورتي أنا وفيق من أيام الجامعة. لكن الغريب إن كان واقف جنبنا شخص تالت، رجل معرفوش. حماتي قالت بصوت مرتعش: ـ الشخص ده هو السبب الحقيقي اللي خلّى وفيق يخاف من إنك تعرفي الحقيقة. بصيت للصورة مرة تانية، وفجأة عرفت الرجل. كان والد وفيق. والد زوجي اللي مات قبل جوازنا بسنة. وتحت الصورة كان مكتوب بخط إيده: “لو نيرة عرفت الحقيقة… ابني مش هيقدر يهرب من اللي عمله.” ساعتها فهمت إن الحكاية أكبر بكتير من طمع وفيق، وكان لازم أعرف… إيه اللي عمله قبل ما يتجوزني. مسكت الصورة وأنا مش قادرة أبعد عيني عنها. بصيت لحماتي وقلت: ـ قوليلي الحقيقة كلها. تنهدت وقالت: ـ أبو وفيق كان عارف إن ابنه داخل الجواز طمعان في فلوسك. حاول يمنعه، لكن وفيق كان سبق وخد منه أوراق ومستندات تخص أملاك العيلة وباع جزء منها من وراه. بصيت لوفيق: ـ يعني إنت كنت بتسرق حتى من أبوك؟ نزل عينه في الأرض. حماتي كملت: ـ أبوك اكتشف كل حاجة قبل وفاته، وكتب الورقة دي عشان لو حصل له حاجة تعرفي الحقيقة. سكت شوية، وبعدها حطيت الصورة على الترابيزة: ـ كفاية. وفيق قرب مني وقال: ـ نيرة، أنا مستعد أصلح كل حاجة. بصيت له بهدوء: ـ في حاجات بتتصلح بالاعتذار… وحاجات الاعتذار بييجي بعدها متأخر أوي. وقعت على ورقة الطلاق. وبعدها المحامي بدأ إجراءات استرداد الأموال اللي اتسحبت من الشركة بشكل غير قانوني، وفي خلال أسابيع خرج وفيق من الفيلا، واتقفلت كل الحسابات اللي كان بيتصرف منها من غير حق. ريم اختفت من حياته قبل حتى ما إجراءات الطلاق تخلص. أما أنا، فبعت الفيلا، وسددت كل الالتزامات اللي تخصني، واحتفظت بالعمارة والمحل والشركة. والأهم… رجعت للدكتور الحقيقي اللي كان متابع حالتي من سنين، وعرفت إن المشكلة الطبية اللي اتقالت لي زمان كانت كذبة كاملة. بعد فترة، بدأت حياتي من جديد. مش عشان أثبت لفيق إني أقدر أعيش من غيره… لكن عشان أثبت لنفسي إني ما كنتش ضعيفة يوم حبيته. أنا بس كنت بحب راجل غلط. وفي يوم وأنا واقفة في مكتبي الجديد، وصلني ظرف من غير اسم. فتحته، كانت جواه ورقة واحدة: “سامحيني يا نيرة… أبويا كان عنده حق.” قفلت الورقة وحطيتها في الدرج. مش كل رسالة لازم يكون لها رد، ومش كل شخص ظلمنا لازم نفضل مستنيين منه اعتذار. أحياناً أقوى انتقام إنك تكمل حياتك وكأن الشخص ده ما كانش النهاية… كان مجرد درس. ومن يومها فهمت إن أغلى حاجة ممكن الست تخسرها مش فلوسها ولا جوازها… أغلى حاجة هي نفسها. وأنا أخيراً… رجعت لنفسي.

مقالات ذات صلة

رواية أقدار واسرار

أمي اشتغلت خدامة في البيوت 20 سنة عشان تساعدني أكون نفسي

بنت جوزي

كنت مروحه البيت.. بقلم أماني سيد

اتصلت بيا حفيدتي

كنت في الشهر التامن من الحمل، واقفة في قاعة محكمة زحمة في أوهايو،

اترك تعليقاً إلغاء الرد