قصة احبني بعد الطلاق/ ايمان شلبي
انا اللي اتسبت طول الوقت عشان مارضيتش اكون سايب وقلبي اتذل واتعلق باكتر حبل كان دايب ومهما تحن وتنادي خلاص باب الرجوع اتسد بكيت بعد الفراق عادي.. بكيت على نفسي مش علي حد!
فات يومين علي طلاقي، يومين مشوفتش اصعب منهم. لو فضلت اوصف شعوري لسنين طويله مش هقدر اوصف اللي جوايا. مين قال إن الزعل بعد الفراق بيكون علي اللي فارقنا! زعل الشخص علي نفسه اسوء واقسي انواع الحزن، زعل الشخص علي قلبه مشاعره روحه اللي متعلقه بشخص بالرغم من أفلاته ليها بكل قسوه.
كنت منعكفه في اوضتي وسط أحزاني وانطفاء روحي ومشاعري المهدوره وقلبي المشروخ، رافضه اشوف حد، رافضه الكلام مع حد، رافضه الاكل، رافضه الحياه من أساسها. عمري ما كنت اتخيل انه يفلت ايدي بالسهوله ديه! عمري ما كنت اتوقع أن الشخص اللي حبيته يبقي كارهني بالشكل ده وكأني عدوته. احساس بشع لما تحس انك شخص غير مرغوب فيه وخاصه مع الاشخاص اللي انت بتحب وجودهم، اللي انت بتحسسهم قد ايه هما مهمين في حياتك ووجودهم مرغوب، وكأن الدنيا جايه معايا بالعكس! وكأني كل ما ارغب حاجه واطلب وجودها تبقي هي كارهه وجودي بكل قوتها.
الباب خبط وخرجني من حاله الصراع والتساؤلات اللي ملهاش اجابه. مسحت دموعي وانا بقول بصوت مبحوح:
- ماما سيبيني لو سمحتي انا م…
- انا عز.
كلمتين مجرد كلمتين بس قلبوا كياني، يمكن ردوا روحي علي الأغلب! دقات قلبي زادت دموعي خانتني ومرحمتش ضعفي، كل خليه في جسمي اتنفضت حسيت بروحي بتترد من تاني وكأني كنت بغرق في بحر غويط ومجرد صوته أصبح طوق نجاه. حطيت ايدي علي قلبي وانا بهمس:
- عز..
- لو سمحتي أنا عايز اتكلم معاكي شويه هستناكي برا تمام؟
رديت بتلقائية ولهفه:
- تمام.
قومت من مكاني بأقصي سرعه بعد ما كانت رجلي مش شيلاني، وكأن الحب شفاء للروح، وكأنه مسكن من غير وجوده حياتنا تتحول لعذاب. مسحت دموعي مع ابتسامه مشرقه اترسمت علي وشي وقومت جريت علي الدولاب. وقفت لحظه قدامه وانا محتاره اختار ايه، كنت حابه البس اشيك طقم عندي، يمكن قلبه يحن، يمكن يشوفني جميله ويطلب مني أننا نرجع، يمكن حس بقلبي، او يمكن مش قادر علي بعدي وحس أني فارقه. الف سؤال وسؤال جه في بالي في الثانيه الواحده وانا واقفه قدام الدولاب …
