ليلة العمر
الحلقة الثانية
شيماء أمام وكيل النيابة منهارة تماماً والدموع لا تفارق عينيها.
وكيل النيابة (بيتر جميل): “اهدي يا مدام شيماء من فضلك.”
شيماء: “اهدى ازاي وأنا جوزي بيتهمني اتهام فظيع زي ده!!”
بيتر: “هاطلبلك عصير لمون.”
شيماء: “مش عاوزة اشرب حاجة خالص.”
بيتر: “طيب اهدي عشان نعرف نتكلم.”
شيماء: “أنا هديت خلاص اتفضل.”
يطلب بيتر من الكاتب أن يغادر الغرفة:
بيتر: “من فضلك يا حسام سيبنا لوحدنا شوية وقولهم يبعتوا اتنين لمون هنا.”
حسام: “حاضر يا أفندم.”
شيماء (متعجبة): “حضرتك طلبت منه ليه يطلع برة!”
بيتر: “عشان تعرفي تتكلمي براحتك بدون كسوف وبعيد عن أي تحقيق رسمي.”
شيماء: “يعني إيه مش فاهمة!”
بيتر: “يعني لو فيه حاجة عاوزة تقوليها اعتبريني أخوكي.. اتكلمي براحتك خالص وأنا أوعدك إني هساعدك على أد ما أقدر.”
شيماء: “حضرتك تقصد إيه بكلامك ده!! أنا اللي عندي كله قولتهولك.”
بيتر: “امممممم.. يعني مش عاوزة تصارحيني بحاجة كده ولا كده!”
شيماء: “حضرتك بتلف وتدور على إيه بالظبط! كلامك فيه تلميحات أنا مش فاهماها.”
بيتر: “مدام شيماء انتي طلبتي ليه عرضك على الطبيب الشرعي!”
شيماء: “عشان اثبت برأتي من الاتهام الباطل اللي بيتهمني بيه مدحت جوزي!!”
بيتر: “اللي هو طبعا إنك كنتي عذراء وإنه تم فض غشاء البكارة بتاعك ليلة دخلتك على جوزك المهندس مدحت.”
شيماء: “أيوا طبعاً.”
يتنهد بيتر ويصمت قليلاً.
شيماء: “هي إيه الحكاية بالظبط!!”
بيتر: “أصل تقرير الطب الشرعي وصل النهاردة وبيقول كلام مش لطيف بصراحة.”
شيماء: “بيقول إيه!”
بيتر: “بيقول إن حضرتك مكنتيش عذراء ولا حاجة ليلة دخلتك على جوزك المهندس مدحت وأن ادعاء عذريتك وفض غشاء البكارة يوم الدخلة ادعاء كاذب.”
شيماء (بانهيارغاضب): “انت بتقول إيه! انت اتجننت انت كمان ولا إيه! أنا أشرق منك ومنه.”
بيتر (بغضب): “مدام شيماء أنا ممكن اوجهلك دلوقتي تهمة إهانة عضو نيابة أثناء مباشرة عمله وأحاسبك على الإهانة دي.”
شيماء (منهارة): “أنا أسفة معلش.. بس أناااا.. أنا مصدومة أنااا.. الكلام ده مش مظبوط.. مش مظبوط حضرتك.. والله العظيم الكلام مش مظبوط.. ازاي أبقى!!!.. لا لا.. فيه حاجة غلط صدقني.. أنا بنت ناس محترمة والله وعمري ما عملت حاجة غلط.”
بيتر: “مدام شيماء اهدي من فضلك.”
