ليلة العمر
الفصل السابع
حزمت ريم حقيبة السفر وتستعد لمغادرة المنزل، ويحادثها أخوها جمال في المحمول حيث ينتظرها بالأسفل لتوصيلها إلى المطار.
ريم: “أيوه يا جمال أدينا نازلة أهوه.”
جمال: “بقالك ساعة بتقوليلي نازلة!! شهلي شوية عشان ميعاد الطيارة.”
ريم: “أوكيه.. سلام.”
وبعد أن تغلق الخط تنظر في مرآة التسريحة ثم تستدير ناحية السرير وتقول:
ريم: “هتوحشني.”
ينهض مدحت (زوج شيماء) من السرير وهو يرتدي قميصاً وبنطالاً ويتوجه نحوها، ويمسك بكلتا يديها ويقبلهما قائلاً:
مدحت: “انتي اللي هتوحشيني.”
ريم: “بجد هوحشك!!”
مدحت: “عندك شك في ده!”
ريم: “بصراحة اه!! مش هتصدقني لو قولتلك إني عايشة معاك اليومين دول وأنا مرعوبة منك.”
مدحت: “مرعوبة مني أنا!! ليه!”
ريم: “خايفة تغدر بيا زي ما عملت مع شيماء!! انت بياع أوي يا مدحت وعندك استعداد تضحي بأقرب الناس ليك.”
مدحت (ضاحكاً): “هههههه.. مش أوي كده.. وبعدين ما انتي كمان خدعتي أقرب الناس ليكي.. جوزك اللي انتي بتخونيه معايا وصاحبتك شيماء.. عزيزتي ريم يؤسفني أقولك إن احنا الاتنين أوسخ من بعض!!”
يستدير مدحت ويشعل سيجارة.
ريم (بغضب): “أنا إن كنت خنت جوزي فده عشان حبيتك يا مدحت، وبعدين انت عارف إن احنا اتجوزنا جواز صالونات وأكبر مني بعشرين سنة واتفرض عليا من الآخر.. انت بقى إيه عذرك إنك تخدع شيماء وتبهدلها بالشكل ده!! مش بقولك انت بقيت مرعب أوي.. بعد إذنك عشان ميعاد الطيارة.”
مدحت: “استني بس.. انتي زعلتي ولا إيه؟ أنا بهزر معاكي يا بيضة.. هههه.”
ريم: “ابعد إيدك عني.. وأنا غلطانة إني حبيتك وسلمتلك نفسي عشان في الآخر أسمع منك الكلام ده.”
مدحت: “في إيه يا بنتي.. أنا بهزر معاكي.. وانتي عارفة إني مقدرش أستغني عنك.. أنا أسف يا ستي وادي راسك أهه.. مينفعش تسافري وانتي زعلانة مني.. ده أنا أموت.”
ريم: “بجد!!”
مدحت: “اه بجد.”
يقترب منها لينوي تقبيلها وفجأة يرن جرس الباب.
مدحت: “إيه ده.. هو انتي مستنية حد يجيلك؟”
ريم: “لا أبداً.. جايز جمال يكون استعوقني.. خليك هنا وبعد ما أمشي ابقى انزل انت.”
مدحت: “تمام.”
ريم: “باي.”
تقبله ريم.
مدحت: “بحبك.”
ريم: “وأنا كمان.”
يرن جرس الباب بطريقة هستيرية، تحمل ريم الشنطة وتتوجه نحو الباب، وعندما تفتحه تجد شيماء وتحمل في يدها سكيناً!
ريم (بدهشة صاعقة): “شيماء!!!!!!”
