بعد 3 شهور جواز، حماتي بدأت تسألني كل يوم: لسه مفيش خبر حلو؟
حسام بكل بساطة وبصوت مليان تكبر قال: عمي.. بنتكم طلعت من بيتي غضبانة وبتبلّى على أمي بتهمة كذابة. أنا مديها فرصة ترجع وتعتذر لأمي، لو ما رجعتش خلال 24 ساعة، يوصلها ورقة طلاقها، ومش هتشوف قايمة ولا دهب ولا أي حق من حقوقها!
أبويا ضحك ضحكة استهزاء هزت الصالة: طلق يا حسام! طلق يا ابن الأصول! بس وحياة جلال الله، الرد مش هيكون منك، الرد هيكون من المحكمة والنيابة العامة بتهمة الشروع في القتل والإضرار العمد!
قفل أبويا السكة في وشه، ونزلنا فوراً للمحامي.. الأستاذ فاروق، راجل كبير وفاهم شغلانات البيوت والقضايا الكبيرة. قعدنا معاه وشاف تقرير المعمل، وفحص الحرز اللي كان معايا: الكوباية الصغنونة اللي خبيت فيها شوية الشوربة.
الأستاذ فاروق هز رأسه وقال: التقرير ده ممتاز، بس عشان القضية تبقى مقفولة بالضبة والمفتاح في النيابة، محتاجين محضر إثبات حالة فوراً، ونطالب بإعادة تحليل العينة في الطب الشرعي بأمر النيابة.. وهنرفع قضية تبديد وقضية طلاق للضرر مع حماية حقوقك.
وبدأت الحرب.. بعد يومين بالضبط، وصلني خبر إن حسام عمل للأسف الحركة المتوقعة: راح ودى ورقة طلاقي غيابي! فاكر إنه بكده بيخلص من وجع الدماغ وبيقطع عليا طريق المطالبة بحقوقي، بس ما كانش يعرف إن اللعبة يلا دوب بتبدأ.
حماتي، الست نجوى، كانت فاكرة إن الموضوع خلص بطلاقي. بدأت تمشي في المنطقة عندهم وتقول للناس: الحمد لله اللي نجى ابني من الست العاقر اللي كانت عاوزة تتهم أمه وتخرب بيته! ده أنا جايبالة عروسة ست العرايس، بنت أختي، هاتجوزهالوا الشهر الجاي!
الكلام ده كان بيوصلني عن طريق جارتنا اللي ساكنة جنبهم. كانت القسوة بتموتني من جوة، بس الوجع ده تحول لقوة.. قوة خلتني أصر إني أرد كرامتي وصحتي.
رحت لدكتورة نسا وتوليد كبيرة جداً ومعروفة، عشان أطمن على نفسي. الدكتورة كشفت عليا وطلبت تحاليل كاملة لأنسجة الرحم والهرمونات عشان تشوف تأثير المادة اللي كنت بشربها على مدار أشهر.
قعدت قصاد الدكتورة وأنا برتجف: دكتورة.. طمنيني، أنا كده مش هعرف أخلف خالص؟
الدكتورة بصتلي بحنان وقالتلي: بصي يا ندى.. المادة اللي كانت بتدخل جسمك مادة سمية شديدة بتعمل انقباضات بتمنع ثبوت أي جنين وبتسبب ضمور مؤقت في بطانة الرحم.. الحمد لله إنك اكتشفتي الموضوع ده قبل ما المادة تدمر الأوعية الدموية بشكل نهائي! الرحم بتاعك متأثر، ومحتاجة علاج مكثف لمدة 6 شهور عشان نطرد السموم ونرجع البطانة لطبيعتها، لكن أمل الشفاء والخلفة موجود وبقوة.. بفضل ربنا إنك وقفتي الجرعات في الوقت المناسب!
