طلقني قبل فرحي حكايات صافي هاني

جريت على البلكونة أنا وأمي وأبويا والفضول والذهول مالينا ولقينا الشارع كله متجمع وصوت الزعيق والخناق مسمع لآخر الدنيا وأم رأفت وأخته واقفين في وسط الشارع والكلبشات في إيديهم وإيد العروسة الجديدة اللي كانوا طايرين بيها ورأفت وصل يجري ويصوت ويقول للظابط سيبوهم دول مالهمش ذنب والمأذون واقف على جنب ماسك دفتره ووشه جايب ألوان والناس في المنطقة كلها بتتفرج وتشاور عليهم ويقولوا سبحان الله لسه كاسرين بخاطر بنت الحلال وربنا فضحهم في ساعتها في نفس المكان. رأفت بص لفوق فجأة ولقاني واقفة في البلكونة ببص له بنظرة كلها قوة وعزة نفس وبدون ولا دموعة واحدة حسيت إنه صغر في ثانية وبقى قد النملة ونزل راسه في الأرض من الخزي والعار ومشي ورا بوكس الشرطة وهو مكسور وضايع وضهره منحني من الندم.

أبويا حط إيده على كتفي وطبطب عليا وقالي شوفتي يا بنتي ربنا كبير إزاي ودعوة المظلوم ليس بينها وبين الله حجاب دموعك دي كانت غالية اوي عند ربنا والكسرة اللي كانوا ناويين يكسروهالك ردت في نحورهم والباب اللي اتقفل في وشك ربنا قفله عشان ينجيكي من القاع اللي هما فيه دلوقتي وأنا حسيت إن جبل وانزاح من على صدري والتفت لأمي وقولت لها خدي أكياس الفرح دي شيليها مكانها الفرح لسه جاي وصاحب نصيبه الحقيقي ربنا شايله لي في علم الغيب وبدأت من اللحظة دي بالذات حياة جديدة خالص مفيهاش أي مكان لشخص مايعرفش قيمتي ولا يصون عشرتي.

وبعد مرور سنة كاملة على اليوم ده، كنت قاعدة في نفس الصالون، بس المرة دي البيت كان مليان زغاريط بجد، زغاريط فرحة مش مجاملة، والستائر الجديدة بتتعلق وأكياس الفرح مالية المكان، بس المرة دي مع راجل بجد، ابن أصول عرف قيمتي من أول دقيقة وشاف في الـ 29 سنة نضج وعقل وجمال مايدبلوش، وكان دايماً يقولي إنتي أحلى وأعظم أم لولادنا في المستقبل بإذن الله. وفجأة وأنا برتب حاجتي، عيني جت على تليفوني ولقيت رسالة مبعوتة لي من رقم غريب، فتحتها ولقيتها من رأفت! كاتب لي فيها: “أنا عايش في جحيم من يوم ما سبتك، أمي وأختي بقوا سيرتهم على كل لسان بعد الفضيحة، والكل رافض يناسبنا، وأنا مش ملاحق على القضايا والمصاريف والمحاكم، دنيتي اتهدت ومبقتش عارف أنام من كابوس ظلمك.. أبوس إيدك سامحيني وارجعي لي وأنا هعملك كل اللي تتمنيه ومحدش من أهلي هيتدخل في حياتنا تاني”.