دنيا وحسن بقلم ملك ابراهيم

ولد نايم على الرصيف في عز البرد، واخته اللي عندها خمس سنين قاعد جنبها وبتقوله: "أنا جعانة يا حسن". الآب والأم ماتوا وسابوا ولادهم الاتنين؛ حسن عمره 12 سنة ودنيا عمرها خمس سنين. أبوهم كان عنده أرض وبيت كبير عايشين فيه، لحد ما وصل عمهم جابر عشان ياخد العزا. وبعد العزا وقف قصاد ولاد أخوه.. في أوضة الصالة الضيقة، لمبة بترعش فوق رأس جابر عمهم، وحسن واقف قدامه ماسك إيد دنيا الصغيرة اللي مخبية وشها في ضهر أخوها. جابر قال بجفاء: انت وأختك ملكوش ورث عندي. تاخد أختك في إيدك وتشوفوا مكان تاني تعيشوا فيه، عشان أنا هبيع الأرض والبيت وأسافر.. أرض أبوك والدار بقوا بتوعي أنا دلوقتي. حسن اللي لسه عمره 12 سنة، عينه لمعت بالدموع قبل ما يوطيها في الأرض، وصوته طلع مكتوم: يا عمي انت أخو أبويا وملناش غيرك بعد ما أبويا وأمي ماتوا.. إحنا نروح فين أنا وأختي الصغيرة؟ والأرض والبيت دي فلوس أبونا ومن حقنا! جابر نفخ دخان السيجارة في وشه من غير ما يبصله، ورد ببرود: دي مش مشكلتي.. أبوكم مات وسابكم، وأنا مش هربي عيال حد. خد أختك وامشي، بدل ما أقول إني شوفتك بتسرقني وتقضي عمرك كله في الحبس وأختك تترمي في أي ملجأ. دنيا أخته الصغيرة شدّت إيد حسن بخوف وسألت بصوت طفولي: إحنا هنسيب بيتنا يا حسن؟ هما بابا وماما مش هيرجعوا تاني؟ حسن ضغط على إيدها، وبص لجابر بصة طويلة، كأنه بيحاول يفهم إزاي الراجل اللي كان بيقوله "يا عمي" وفاكر إنه هيحميهم ويحافظ على حقهم.. دلوقتي عايز يرميهم للشارع عشان ياخد حقهم وفلوس أبوهم. في اللحظة دي حسن خاف على أخته وإن عمه يسجنه فعلاً ويضيع منه أخته. سحب دنيا من إيدها، وخرجوا من قدام جابر وهما سامعين صوت ضحكته الباردة وراهم. خرجوا للشارع والرياح الباردة لسعت وشهم في نص الليل. دنيا اتشبثت في دراع حسن، جسمها بيترعش من البرد وهي بتقول بصوت مكسور: أنا جعانة يا حسن.. وبردانة. حسن بص حواليه، الشوارع فاضية إلا من نور أعمدة بعيد ومحلات مغلقة. مسكها من إيدها وضغط عليها يطمنها، وهو نفسه سنانه بتخبط من السقعة: استحملي شوية يا دنيا، هدورلك على حاجة. لفوا عند ناصية الشارع، وقفوا قدام مطعم صغير لسه منور. من الإزاز شافوا صحون الكفتة والسندويتشات سخنة، وصهد الأكل بيعكس على الإزاز. عيون دنيا ثبتت على طبق بطاطس محمر، وحسن حس بطعمه في بقه وهو بيفتكر أبوه وأمه. جت في باله ليلة زمان، قبل الحادثة، لما أبوهم خدهم نفس المطعم ده. أمه كانت تضحك وتقول: "كلوا اللي نفسكم فيه بس طبخي أحسن من طبخ المطعم ده"، وأبوه يغمز لحسن ويقوله: "مفيش أكل أحلى من أكل أمكم يا حسن". حسن ضحك ودنيا ساعتها كانت بتاكل وتضحك، والصلصة ملطخة وشها، وأمها تمسح وشها وتنضف لها إيديها بحنية. رجع حسن لصوت دنيا وهي بترعش من البرد: مش هناكل يا حسن؟ رد وهو زوره محروق: هناكل.. بس دلوقتي خلينا نمشي. شدها من إيدها يبعدها عن الإزاز، لكن عينه فضلت متعلقة بالأكل، وقلبه بيتقطع من جوه لأنه عاجز حتى يجيب لأخته سندويتش واحد. حسن شد دنيا وراه، مشيوا وهما مش عارفين ليهم وجهة. دنيا بتعيط وبتشده من هدومه: "جعانة وعايزة أنام". رجليه وجعته، بس لقى نفسه قدام محطة القطر القديمة، النور الأصفر مكسور على الرصيف. دخلوا المحطة، لقوا قطر واقف. من غير كلام، حسن شالها وركبوا آخر عربية. دنيا أول ما سندت رأسها على كتفه نامت، دموعها لسه على خدها. حسن مسح وشه بإيده، ولف جاكيت أبوه القديم عليها عشان البرد. لكن الأقدار دخلت في طريقهم؛ القطرتحرك ونزل حسن في إحدى المحطات يشتري حاجة لأخته، فالقطرتحرك ودنيا جواه. نزل حسن يبكي، ولقاه ناظر المحطة عبد الرحيم. عبد الرحيم مسك إيده جامد وقال: متخافش يا بني أختك هترجعلك.. أنا بلغت المحطة الجاية اللي هيقف فيها القطر وأكيد هنلاقيها. حسن بص له وعينه مليانة خوف وسأل: طب لو ملقينهاش؟ عبد الرحيم: هدور لحد ما نلاقيها.. وهعتبركم ولادي وأربيكم في بيتي.. أنا اتحرمت من الخلفه وانت وأختك هتبقوا عوض ربنا ليا. حسن كان حاسس بنار في قلبه، خايف على أخته ومذعور، غمض عينيه من التعب وبيحلم بعيون دنيا وهي نايمة على كتفه في القطر. جوه القطر، دنيا صحيت على صوت الكراسي الحديد والهزة، ملقتش حسن جنبها.. عيطت. كان في عيلة مكونة من أب وأم وطفلة من عمر دنيا ركبوا من المحطة اللي فاتت وهينزلوا آخر الخط. شافوا بنت صغيرة نايمة لوحدها في القطر ولما صحيت كانت بتعيط وبتدور على أخوها. الست مالت عليها تمسح دموعها: مالك يا حبيبتي؟ دنيا اتكلمت وسط العياط: أنا بدور على حسن أخويا.. بابا وماما عند ربنا وعمي خد فلوسنا وحسن سابني هنا ومشي. الراجل بص لمراته، وبنتهم صحيت وبصت لدنيا بعينين خايفين ومُشابهين. مراته خدت دنيا في أحضانها، وناولتها سندوتش جبنة من شنطتها: كولي يا روحي لحد ما نوصل. دنيا كلت لقمة، ومسكت إيد البنت الصغيرة، كأنها لقت طوق نجاة. الراجل قال لمراته بهمس: ناخدها معانا ونبلغ في المحطة الجاية. الست ردت على جوزها: لو سلمناها في المحطة هتتبهدل.. إحنا هناخدها معانا لحد ما يظهر لها أهل.. ولو مظهرش حد أهي تعيش معانا وتساعدني في شغل البيت. دنيا نامت وهي متشبثة بإيد البنت، والقطر بيجري بيهم. حسن كان نايم في بيت ناظر المحطة بيحلم بأخته، مش عارف هيلاقيها إزاي؟ ودنيا مع ناس أغراب متعرفش مصيرها معاهم هيكون إيه. ناظر المحطة لفّ مع حسن على أخته في كل المحطات، شهور عدّت.. كل قطر يصفّر، حسن يجري للرصيف، وبعدين يرجع خطواته تقيلة. سؤال واحد بيعيش في دماغه: يا ترى انتِ فين يا دنيا؟ لحد ما في ليلة، قعد على الكنبة وفقد الأمل إنه يلاقي أخته. عبد الرحيم حط إيده على كتفه: "هنفضل ندور". حسن هز رأسه، وبلع ريقه وسكت. غمض عينه على ضوء السلم الأصفر، واتخيل دنيا بتضحك في حتة بعيدة، ومكانش عارف إنها في نفس اللحظة ماسكة إيد بنت تانية وخايفة تنام أحسن تختفي زي ما حسن اختفى. السنين جريت، وعبد الرحيم مخلاش كلمة من وعده تهبط. دخّل حسن المدرسة، يصحى له بدري، يذاكر له تحت لمبة السلم، وكل قرش يجيبه من المحطة يخبيه لهدوم ومصاريف. حسن كبر وهو شايل صورة دنيا في العين وبروازها متني في محفظته. خلص ثانوية، عبد الرحيم باع غويشة لمراته عشان أول قسط في الجامعة، وحسن دخل حقوق. الليالي كانت سهر ومذكرات، والصبح يشتغل في المخازن. لما النتيجة طلعت، عبد الرحيم علّقها على الحيطة بإزاز، ومراته دبحت فرختين ونادت الجيران: "ولدنا كبر وبقى محامي". على الناحية التانية، كبرت دنيا في بيت عيلة "نعيمة" (البنت الصغيرة اللي كانت في القطر). ولما سن الجواز دق، العرسان بدأوا يدقوا الباب. أغلبهم جايين عشان دنيا: "سمعنا عن البنت الحلوة اللي عندكم". نعيمة مؤدبة وبنت حلال، لكن دنيا جمالها سارق العين. أم نعيمة كل مرة تبتسم للضيوف، وبعد ما يمشوا تسيب الباب وتدخل تكتم غيظها. أبو نعيمة يرمي كلمة عابرة: "البيت بيت بنتي، واللي ييجي لنعيمة أهلاً، واللي ييجي لدنيا.. يتفضل يمشي". دنيا تحس بالوشوشة، تبعد عن الصالة، وتساعد في المطبخ زيادة، كأنها بتتأسف على حاجة معملتهاش. مرة سمعت أم نعيمة بتقول لجارتها: "مصلحة بنتي أهم". دنيا بلعت ريقها، ودخلت توَضّب أوضة نعيمة، حطت الطرح على الدولاب ورتبت السرير، وفضلت سرحانة في شباك المطبخ: لو حسن هنا، كان دخل ضحك، وقال "محدش قدك يا دنيا"، ومشي الزعل بكلمة. بس حسن بعيد، وهي كل يوم تشيل شعور إنها ضيفة زادت على أهلها، وتحاول تعوّضه بخدمة صامتة، وعيونها تنام كل ليلة على صورة ولد صغير في خيالها، مش عارفة إن الزمن كبّره وبقى محامي بيدوّر عليها في كل محضر. الليلة دي أم نعيمة مطوّلتش في اللف والدوران. دخلت على دنيا وهي لسه بتطبق الغسيل، وقفلت الباب وراها: كفاية علينا لحد كده.. بنتي عانس جنبك، وكل اللي ييجي يمشي من بابنا عشانك.. روحي لحالك بعيد عننا. دنيا اتجمدت، الغسيل وقع من إيدها: طب أروح فين؟! أم نعيمة بصت الناحية التانية: ربنا يسهلك، دوري على أهلك. لمّت دنيا طرحتين وحاجاتها في كيس بلاستيك، ونزلت السلم قبل ما أبو نعيمة يرجع من القهوة عشان متبصش في وشه. الشارع استقبلها تاني، بس المرادي مافيش حسن يمسك إيدها. مشيت لحد ما رجليه وجعوها، قعدت على رصيف محطة، حضنت ركبها، وجواها صوت واحد بيتكرر: "حسن... لو لقيتك بس". الليل كان بارد، والطرحة على رأسها قديمة، بس الحلم اللي شايلاه جديد ومضواي: تلف المدن لحد ما تلاقي اسم أخوها على يافطة، أو تسمع حد بينده على واحد اسمه حسن، ويطلع هو. نامت على الكرسي وهي حاطة الكيس تحت رأسها، وعينيها مقفولة على خيال ولد صغير ماسك إيدها وبيعدّي بيها من الشارع للمحطة، زي زمان. دنيا فضلت ماشية في شارع ضلمة، حواري أضيق من صوتها. راجل طالع من خمارة سدّ عليها الطريق، عينه حمرا وريحة بقه عفنة، ومَد إيده. دنيا رجعت خطوة، وهو قرب، إيدها لمست قالب طوب جنب حيطة. لما هجم، ضربته على دماغه بكل الرعب اللي فيها، وقع سايح في دمه، وهي جريت. الراجل دخل المستشفى بين الحياة والموت، والشرطة جابتها من كاميرا محل. في القسم، دنيا بتحكي: "حاول يلمسني"، والمحضر مكتوب سرقة. الضابط بيبص لقيد التعريف: لا شهادة، لا أهل، لا عنوان. اتحبست احتياطي. جوه الحجز، السقف عالي واللمبة بتطن. دنيا على بلاط بارد، بتفتكر إيد حسن وهي بتعدّيها الشارع. بتنام على صوت مفتاح الزنزانة، وتصحى على اسمها وهي نازلة تحقيق. كل مرة تقول: "ما سرقتوش... ده كان هيإذيني"، بس الورقة مبتتغيرش. في ليلة هادية، همست لنفسها: "يا رب ألاقي أخويا حسن، أنا محتاجاه أوي دلوقتي"، وما عرفتش إن أخوها اللي بيدوّر من سنين بقى محامي، وإن اسمه اتردد الأسبوع اللي فات في نيابة جنب زنزانتها، من غير ما الجدران تقول. اليوم بتاع الجلسة جه، دنيا وقفت في القفص، إيدها ماسكة حديدة باردة. قبل قضيتها كان في مرافعة تانية؛ محامي شاب واقف ببدلة غامقة، صوته هادي وواضح: "التهمة بلا دليل، والشهود ما شافوش حاجة، ونطلب براءة". القاعة ساكتة، والكل مركز معاه. دنيا عينيها عليه، قلبها بيدق بسرعة مش فاهمة ليه: الملامح، الوقفة، النبرة فيها حاجة مألوفة، كأنها شافت الشاب ده زمان، صغير، وهو بيشدها بعيد عن الإزاز قدام المطعم. حاول تركز في الكلام، بس دماغها بتعيد ملامحه: الخط حوالين العين، الحركة وهو بيشاور للقاضي، الضغطة الخفيفة على سنانه لما بيتضايق. همست لنفسها: "حسن؟" الكلمة وقعت جوه قلبها قبل ما عقلها يصدق. القاضي خبط بالجلسة اللي بعدها، دنيا رجعت خطوة لورا، عينيها عليه وهو بيجمع ورقه، مستنية أي لمحة تقولها إن الحدس ده صح، أو إن التعب خلاها تشوف اللي هي عايزاه في أي شاب مألوف. القاعة فضيت شوية، والقاضي طلع يراجع الأحكام. المحامي الشاب قرب من موكلته في القفص يطمنها ويوعدها بالبراءة. دنيا، إيدها متعلقة بالقفص، نادت عليه بصوت مبحوح...