تاجير رحم / اماني سيد
— فاكرين إنكم العصابة الوحيدة اللي بتعرف ترشي وتزور؟! الدكتور ده أمه كانت بتشتغل خادمة عند أبوك ورميتوها لما مرضت، وكان مستني اللحظة اللي يدمركم فيها.. البويضات اتبدلت من أول دقيقة يا حازم، والولدين دول ولادي أنا شرعاً وقانوناً وجينات، والورث اللي حمايا هيموت عليه.. مش هيدخل جيب نانسي منه مليم أحمر!
صوت صراخ نانسي هز أركان المستشفى كلها، انهارت على الأرض وهي بتشد في شعرها وتضرب بإيديها في الهوا بهستيريا:
— لأ مستحيل! أنتِ بتكدبي.. العيال دول ولادي أنا وحازم، أنا اللي قولتله يزرعهم! ده ابني وحقي والورث ده بتاعي أنا!
حمايا اتسمر مكانه، سيجاره وقع من إيده على الأرض، وحط إيده على صدره وهو بياخد نفسه بصعوبة ووشه بيتحول للون الأزرق من فرط الصدمة.. الملايين والشركات والورث اللي كان مشروط بالولد من دمه ودم حازم، بقى في إيد رحمة وبشروطها، وبنت أخوه المدللة خرجت من الحسبة صفر اليدين.
حازم رمى ورقة التحاليل في الهوا، وقرب من السرير وهو بينهج وعينيه زي الجمر، صوته كان مبحوح ومرعوب:
— أنتِ عملتي إيه؟! خططتي لده من إمتى؟! كنتِ عارفة وساكتة الشهور دي كلها؟!
رفعت راسي بصعوبة من على المخدة، الألم في بطني كان بيحرق بس الانتصار في قلبي كان أقوى من أي مسكن:
— ساكتة عشان اللحظة دي.. كنت مستنياك تشوف غبائك وغرورك بيوقعوك في شر أعمالك. فكرت إنك تقدر تشتري كل حاجة بفلوسك وتكسرني؟! الدكتور بلغ النيابة والشرطة رسمياً بمحاولة إجبار على تأجير الأرحام والتزوير الطبي قبل ما أدخل العمليات بساعة.. وبلاغ الاختطاف والحبس القسري محطوط على مكتب النائب العام.
في اللحظة دي، اتفتح باب الأوضة ودخلت قوة من الشرطة ومعاهم وكيل النيابة، بصوا لحازم وباباه اللي كان بيتسند على الحيطة بنظرات حاسمة:
— الأستاذ حازم والأستاذ نصر المنشاوي؟ مطلوب القبض عليكم بتهمة خطف واحتجاز قسري وتزوير تقارير طبية ومحاولة إجراء عملية غير قانونية.
نانسي حاولت تجري ناحية الحضانة عشان تاخد الولاد، بس ممرضتين منعوها بقوة، والظابط شاور لعسكري يقفل عليها الطريق.
حازم بص لي بنظرة كلها كسر ورجاء لأول مرة في حياته، شفايفه بتترعش:
— رحمة.. أنا أبوهم، أرجوكي.. متعمليش فينا كده!
