لغز طليقي حكايات زهرة
فضلت باصة للمقدم هشام فترة طويلة.. مسكت التليفون أبص في الساعة.
صح.. المكالمة دي ما عدّاش عليها نص ساعة!
أنتم متأكدين؟
متأكدين من إيه؟
إن أهله ما يعرفوش هو فين؟
أيوة.
قعدت عدل وبصيت له بجدية: يبقى إحنا كده قدام مشكلة كبيرة أوي يا فندم.
المقدم هشام ركز معايا: تقصدي إيه؟
من عشر دقايق قبل ما حضرتك تخبط على الباب، مدام ثريا كانت بتكلمني في التليفون.
أم حسام؟
أيوة.
وقالت لك إيه؟
حطيت التليفون على الترابيزة: قالت لي إن حسام في المستشفى.
النقيب أحمد بص للمقدم هشام بسرعة بذهول.
كملت كلامي: ومش بس كده.. دي قالت لي نصاً إنه مش قادر يقوم من على السرير ولازم حد يخدمه.. وطلبت مني أقطع إجازتي وأرجع القاهرة فوراً عشان أقف جنبه!
المقدم يسأل بلهفة: مستشفى إيه؟
ما قالتش.
قسم إيه؟
ما قالتش.
تعبان بِإيه؟
برضه ما قالتش.
وما سألتيش؟
سألتها سؤال تاني خالص.
سألتيها إيه؟
سألتها ليه العروسة الجديدة ما تقعدش جنبه وتخدمه.
وردت قالت إيه؟
اتهربت من الإجابة.. وقالت لي: ماكيش دعوة بالتفاصيل دي المهم ترجعي!
الجو في الأوضة اتغير تماماً.. الضباط مابقوش بيحققوا معايا أنا بس، دول بدأوا يفكروا في اللغز بتاع المكالمة دي!
بصيت للمقدم هشام: حضرتك بتقول إن العيلة عملت بلاغ باختفاء حسام.. هي مدام ثريا هي اللي بلغت؟
ما جاوبنيش على السؤال ده، بس قال: سجل المكالمات لسه عندك؟
أيوة.
فتحت التليفون.. الرقم كان في قائمة البلوك بس المكالمة واضحة بالوقت.
المقدم هشام نقل الوقت والتاريخ: مليني الرقم.
مليته والنقيب أحمد كتبه عنده بسرعة.
بعدها المقدم رجع يكمل أسئلته: آخر مرة شفتي فيها حسام كانت امتى؟
إمبارح.
الساعة كام؟
عشرة الصبح تقريباً.
فين؟
قدام محكمة الأسرة.
وبعد كده؟
هو ركب عربية ومشي.. وأنا طلعت على مطار القاهرة ومنه للغردقة.
اتكلمتوا في التليفون بعد كده؟
لأ.
واتساب؟
لأ.
رسائل؟
لأ.
أي وسيلة تواصل؟
مفيش خالص.
سألني بتركيز: العلاقة بينكم قبل الطلاق كانت عاملة إزاي؟
ضايقني السؤال بس جاوبت: مش كويسة.
سبب الطلاق إيه؟
وهو سبب الطلاق يفرق إيه في موضوع اختفاءه؟
النقيب أحمد اتكلم: حسام اختفى في نفس يوم فرحه.. وححضرتك طليقته اللي لسه متطلقة منه إمبارح وسافرتي فوراً.. طبيعي نحقق مع الدائرة المقربة منه كلها.
