لورا
سافرت لورا ووصلت مطار ميلانو وكان الجو برد وجميل وكل حاجة شكلها نضيف ومرتب بطريقة تخلي الواحد يحس إنه في فيلم وكانت كايلا مستنياها في المطار خدتها بالحضن وقالتلها حمدالله على السلامة يا لورا هتحبي إيطاليا أوي وركبوا العربية وراحوا على الفيلا اللي كانت قصر مش فيلا بجنينة كبيرة مليانة ورد وشجر وفيها بيسين صغير.
ولما دخلوا جوا لقت بنت صغيرة عندها حوالي خمس سنين شعرها كيرلي وعينيها عسلي وبتجري عليها وبتقولها انتي لورا الجديدة صح أنا وتين وده أخويا يامن عندو تلات سنين ونص لورا قلبها اتخطف من جمالهم وحست بحنية غريبة ناحيتهم من أول لحظة.
كايلا قالتلها بصي يا لورا انتي هتكوني مسئولة عنهم من الصبح لحد بالليل أكلهم مذاكرتهم لعبهم نومهم وكل حاجة تخصهم والسواق هيوصلك أي مكان عايزاه والأوضة بتاعتك فوق فيها كل حاجة هتحتاجيها ومستر يزن صاحب الفيلا هيرجع كمان يومين من السفر وهيقابلك ويقولك كل التعليمات بنفسه ولما كايلا قالت اسم يزن لورا حست بقلبها وقع في رجليها وقالت لنفسها أكيد تشابه أسماء مش معقول يكون هو مستحيل الدنيا صغيرة أوي كده.
قضت لورا اليومين دول مع وتين ويامن وكانت مبسوطة معاهم جدا وتين كانت ذكية ولماحة وبتحب الحكايات ويامن كان شقي وبيضحك طول الوقت وبيحب يلزق في لورا وينام في حضنها وكانت لورا بتحس إنها تعرفهم من زمان وإن في حاجة بتشدها ليهم مش مفهومة.
وفي اليوم التالت صحيت الصبح لقت كايلا بتقولها البسي حاجة شيك مستر يزن وصل وعايز يشوفك تحت في الصالون لورا لبست بسرعة ونزلت وهي قلبها بيدق جامد ولما فتحت باب الصالون وشافت الراجل اللي قاعد مديها ضهره وباصص من الإزاز على الجنينة عرفته من ضهره من وقفته من ريحة البرفان اللي عمرها ما نسيتها كان هو يزن بذات نفسه.
يزن لف وبصلها واتصدم أول ما شافها والكوباية اللي في إيده وقعت اتكسرت وفضل باصصلها كأنه شايف عفريت وقال بصوت واطي لورا انتي بتعملي إيه هنا لورا كانت واقفة متجمدة ومش قادرة تنطق ودموعها نزلت لوحدها وقالتله انت انت اللي بتعمل إيه هنا انت اللي صاحب البيت ده انت أبو وتين ويامن.
يزن قرب منها وقالها أيوة أنا أبوهم انتي إيه اللي جابك إيطاليا وازاي جيتي هنا تشتغلي عندي.
