حب غير مسموح دارين الاطروش

رواية: حب غير مسموح بقلم: دارين الأطروش الحلقة الأولى شمس بنت جميلة في أوائل العشرينيات، نايمة ومستغرقة في النوم، ومرة واحدة المنبه بيضرب بصوت عالي أوي الساعة 8 الصبح. شمس تصحى وهي بتتثاءب وتقفل المنبه: إيه يا ربي ده بس!! توب علينا يا كريم. وتقوم بسرعة على أوضة سلمى ورضوى: اصحوا يلا عندكوا جامعة ومدرسة. سلمى: طب سيبيني أنام شوية والنبي يا شمس. شمس: لا يا حبيبتي، الصحيان من النوم والجامعة والشغل مفيهاش يامه ارحميني. رضوى: يامه ارحمينا بقى من الموشح بتاع كل يوم، هو انتي خلاص اعتبرتي نفسك أمنا؟ ده أنا ساعات بنسى إنك أختنا الكبيرة. شمس: بت انتي وهي مش عايزة وجع دماغ، أنا كده هتأخر على شغلي وورايا شغل وقرف وبهدلة، متتعبونيش، يلا كل واحدة في ظرف ربع ساعة تكون جاهزة عبال ما أحضر الفطار، ده إيه الغلب ده ياربي!! سلمى ورضوى يحطوا الغطا تاني على وشهم. شمس: أنا اتأخرت على شغلي ومش حمل الرزالة دي، قوموا بدل ما أقسم بالله... رضوى وسلمى يقوموا بسرعة: خلاص خلاص قايمين أهو. شمس: وانتي يا موكوسة ياللي في تانية آداب مش هتصحي؟! سلمى بغيظ: قايمة يا شمس قايمة يا حبيبتي. شمس: ماشي. شمس تروح تحضر الفطار بسرعة، وتخرج سلمى ورضوى لابسين هدومهم. شمس: يلا الفطار جاهز. سلمى: لا لا مفيش وقت أنا متأخرة (وتبوسها وتمشي بسرعة). شمس: وانتي يا رضوى؟ رضوى: لا أنا كده هتأخر على المدرسة، أنا أولى ثانوي السنادي... باااي (وتبوسها على الخد التاني وتمشي). شمس: باي؟؟؟ والنبي ما انتوا فالحين في حاجة. في بيت نادر: نادر: يا معتز!! اصحى يا معتز... يا ماجد!! ما تصحوا بقى! ماجد يخرج من الأوضة وهو بيتثاءب: إيه الغاغة اللي انت عاملها دي يا نادر؟ نادر: يعني مش عارفين ليه؟؟ انت هتتأخر على جامعتك وهو هيتأخر على مدرسته... دي عيشة تقرف ارحموني ورايا شغل. ماجد: طب اهدى بس متزعلش نفسك الدنيا مش هتطير. نادر: أقولك!! عنكوا ما صحيتوا ولا روحتوا جامعة ولا مدرسة، أدي الفطار أهو وأنا رايح شغلي، دي حاجة تقرف. ويخرج نادر ويرزع الباب وراه. يصحى معتز ويخرج للصالة: هو بيزعق ليه على الصبح؟ ماجد: يعني هي جديدة عليه؟ ما هو ده الموشح بتاع كل يوم... أمال لو مكنش أخونا الكبير كان عمل إيه؟ معتز: بص، مادام خرج يلا نكمل نوم، بلا جامعة بلا مدرسة بلا قرف. نادر يفتح الباب فجأة بصوت عالي وعصبية: لسه ملبستوش؟؟ ماجد ومعتز بفزع: حاااضر! شمس واقفة مستنية الأتوبيس، ويرن موبايلها: شمس: الووو، أيوة يا خالو ازيك؟ خالها: الحمد لله، وانتي أخبارك إيه انتي وسلمى ورضوى؟ شمس: الحمد لله ماشي الحال. خالها: ينفع أجيلك زيارة النهاردة بليل؟ شمس: خير؟ خالها: خير إن شاء الله... يعني... في الواقع... شمس باشمئزاز: آآآه، يعني؟؟ وفي الواقع؟؟؟ يبقى جايبلي عريس... صح؟؟ خالها باندهاش: إيه ده؟ عرفتي منين؟ شمس بسخرية: ما هي واضحة زي الشمس... يعني، وفي الواقع، وعمال تلألأ، يبقى أكيد في مصيبة من المصايب اللي بتجيبهالي. خالها: حرام عليكي، أنا عمري جبتلك مصايب؟ شمس: انت عمرك ما جبت غير المصايب يا خالو... هنضحك على بعض بقى!! خالها: اطمني المرة دي إن شاء الله خير، ومش هنخرج من باب الشقة إلا... شمس مقاطعة بسخرية: عارفة عارفة متكملش والنبي حفظاها، مش هنخرج من باب الشقة إلا وإحنا سامعين زغروطة تهد البيت، يخربيت أم الزغروطة اللي مش عايزة تيجي دي يا خالو! خالها: لا المرة دي بقى عريس مضمون. شمس: يا خالو حرام عليك ارحمني، قولتلك 100 مرة أنا مبفكرش في الجواز دلوقتي، أنا ورايا مسؤوليااات. خالها: يا بنتي مينفعش ترفضي اللي بيتقدمولك وتوقفي حالك علشان إخواتك... هما يعني كانوا أطفال رضع؟؟ دول بسم الله ما شاء الله كبار وعاقلين. شمس باستسلام: ماشي يا خالو حاضر. خالها: هااا، يعني أجي وأجيب العريس؟ شمس: ماشي... اديني نبذة مختصرة كده عنه بسرعة علشان الأتوبيس جه. خالها: اسمه يوسف وعنده 28 سنة. شمس: حلو... يوسف و28 سنة، أنا متفائلة. خالها: مش بقولك لقطة! شمس: طب هو بيشتغل إيه؟ خالها: معرفش بصراحة. شمس: ماشي... الأتوبيس جه... سلام. شمس ركبت الأتوبيس واتمرمطت وسط الزحام. نادر وصل الشغل وقعد على مكتبه مع زمايله: نادر بتنهيدة: صباح الخير. الموجودين: صباح النور. عمرو: إيه، ناموسيتك كحلي ولا إيه؟ نادر: لا وانت الصادق، حياتي كلها اللي كحلي يا عمرو. عمرو: ليه بس؟؟ تقصد يعني علشان إخواتك وكده؟ نادر: اللي جد بقى إن كل لما بيكبروا مشاكلهم بتزيد أكتر وأكتر. عمرو: معلش اتحمل انت قدها، ومتنساش إنك أخوهم الكبير... انت أخوهم الكبير يا نادر. شمس في شغلها مع زميلتها رنا: شمس: يووو، أنا اتخنقت من الكلمة دي، خلاص عارفة إن أنا أختهم الكبيرة، ليه بتفكروني؟! رنا: أنا عايزة أفهمك إنك مش لوحدك اللي بتعاني، عادي كلنا في الهوا سوا. شمس: يا ربي ارحمني يا أرحم الراحمين. رضوى في المدرسة في الفسحة: نرمين: بقولك يا رضوى، إيه رأيك في الواد المز اللي هناك ده؟؟ رضوى: بقولك إيه، أنا مليش في الكلام ده. نرمين: إيه، انتي بتخافي من أختك ولا إيه؟ رضوى: أنا مبخافش من حد. نرمين: يا بنتي اتنصحي شوية، يعني اعرفيلك ولدين تلاتة واتصحبي عليهم وكده. رضوى: لا لا، ده كانت شمس تموتني. نرمين: شوفتي!! أنا مجبتش حاجة من عندي. رضوى: بقولك إيه، قفلي بقى... عندنا مين الحصة اللي بعد الفسحة؟ نرمين: أستاذ عماد شلبي. رضوى: ماشي، يلا بينا نطلع الفصل مليش مزاج أتمشى في الحوش أكتر من كده. شمس في شغلها والمدير يدخل: المدير: إيه، سايبين شغلكوا وبتتكلموا؟ رنا: آسفين يا بسيوني بيه. بسيوني وهو بيبص لشمس باهتمام: صباح الخير يا آنسة شمس. شمس بابتسامة صفرا: صباح النور يا بسيوني بيه. بسيوني بهمس وبرود: انتي اتأخرتي النهاردة، بس متقلقيش أنا مش هخصملك، انتي عارفة أنا بعزك قد إيه! شمس بصوت عالي وحدة: بسيوني بيه!! من فضلك أنا عندي شغل ومش فاضية، وإذا كان على التأخير فأنا آسفة مش هتتكرر تاني... عايز تخصملي مفيش مشاكل. بسيوني باحراج: احم احم، طيب يا آنسة شمس اتفضلي كملي شغلك... عن إذنكوا. شمس: أووووف! رنا: ياباااي، أنا مشوفتش أرذل من كده. شمس: مين سمعك، أنا خلاااص على آخري من البني آدم ده، هو مش حاسس بسنه؟ ده عنده عيال قدي! رنا: بذمتك في بني آدم في الدنيا يبقى اسمه "بسيوني خليفة"؟ هههههههه. نادر في عمله وعمرو قاعد جنبه: عمرو: بقولك إيه، ما تتجوز يا أخي! نادر: هههههههه ضحكتني وأنا مكنش ليا نفس. أتجوز إزاي؟ أنا من ساعة ما أبويا وأمي ماتوا وأنا اللي شايل إخواتي شيل، ده ورايا هم ما يتلم. عمرو: يا عم انت يا دوب عندك اتنين إخوات بتصرف على تعليمهم، وكلها كام سنة يتخرجوا ويشتغلوا ويتجوزوا كمان. وانت بسم الله ما شاء الله مهندس كمبيوتر قد الدنيا وزي القمر. نادر: ربنا يسهل ألاقي بس عروسة. عمرو بثقة: عروستك موجودة... أخت المدام! نادر: طيب، وتفتكر توافق بيا؟ عمرو: مؤكد... ها، قولت إيه، آخدلك ميعاد؟ نادر بقلق: بس... عمرو مقاطعاً: تمام هخدلك ميعاد! شمس راجعة من الشغل الساعة 6 وتلاقي خالها مصطفى قدام باب الشقة: شمس: إيه يا خالو، خضتني حرام عليك! مصطفى: مش قولتلك جاي وجايب عريس؟ هو مستني تحت. شمس: ومطلعش ليه؟ مصطفى: بيتكسف. شمس بصوت عالي: يااا، أخيراً جبتلي حد عنده دم! مصطفى بهمس: وطي صوتك ليسمعك. ادخلي وأنا هطلعه وأجي. شمس تدخل الشقة وتظبط نفسها في المراية، والباب يخبط، تفتح الباب فتلاقي... الحلقة الثانية تفتح الباب تلاقي راجل سنه لا يقل عن 40 أو 45 سنة وخالها واقف جنبه! شمس: أهلاً أهلاً يا عمي اتفضل، أبو العريس مش كده؟؟ الشخص بص لخالها باندهاش، وخالها بص في الأرض وسكت. شمس: الله، هو مكسوف ولا إيه؟ ما تقوله يطلع يا خالو. مصطفى وهو بيشاور عليه: احم احم، الأستاذ ده هو العريس!! شمس فتحت بقها وبرقت: اتفضلوا اتفضلوا. شمس بهمس لخالها وهي بتجز على سنانها: إيه اللي انت جايبه ده؟ ده كبير أوي، هو ده بقى اللي عنده 28 سنة؟! مصطفى: اللي قالي عليه زميلي في المصلحة وأنا قولت بنت أختي أولى من الغريب. شمس: حبيت تعوضني عن حنان الأب جبتلي عريس قد أبويا؟! العريس: احم احم. يقعدوا في الصالون، وشمس من تحت الضرس: منور يا أستاذ يوسف. العريس: يوسف مين؟ لا لا، أنا اسمي فرغلي! شمس بفزع: فرغلي!!!! فرغلي: مبدئياً كده أنا مش هقدر أتجوز دلوقتي، اصبري عليا لأن عليا أقساط. أنا بشتغل دكتور في مستشفى (...)، وحضرتك بقى بتشتغلي إيه؟ شمس: أنا سكرتيرة في شركة بسيوني خليفة بتاعة الكمبيوتر. فرغلي: عظيم، ومرتبك بقى على كده كام؟ شمس بتبصله بغيظ مرعب: ليه؟ في الأوضة، رضوى وسلمى سامعين: رضوى: خالك جايب عريس لاختك، قمرررر من حلاوته افتكرته أبو العريس! وفجأة يسمعوا صوت شمس من برة وهي بتزعق: أنا هوريك، برررره ورحمة أمي ما أنا سيباك! فرغلي: آآآآه يا مجنونة الحقوووني! شمس مسكت الفازة وكسرتها على دماغه! في اليوم التالي في الشغل، شمس بتحكي لرنا: شمس: مقدرتش أمسك أعصابي، أول ما سمعت إنه عاطل وعايزني أنا اللي أصرف عليه روحت ماسكة الفازة وبطحته على دماغه! رنا: وخالك عمل إيه؟ شمس: بقى بيحوش، والحمد لله إنها جت على قد كده. المهم، قبض المرتبات إمتى؟ رنا: كمان 3 أيام. نادر يروح مع عمرو يخطب أخت مراته، ويدخلوا فيلا فخمة، ويطلع أبو العروسة هو "بسيوني خليفة" مدير شركة الكمبيوتر! وتدخل نيرة العروسة، ويتفقوا على الخطوبة، وبسيوني يطلب إن الخطوبة تكون في قاعة كبيرة تليق باسمه. يوم الخطوبة عند باب القاعة: نيرة: لا، انت هتستنى برة، وأنا وبابا هندخل مع بعض، وبعدها انت تدخل وهو يسلمني ليك، وتقوم واخدني منه ومسلم عليه وبايس إيده! نادر بتعجب وغضب: نعم؟؟؟؟؟؟ الحلقة الثالثة نادر بعصبية: انتي فاكراني إيه؟ أنا مقدرش أتنازل عن كرامتي... دلوقتي بتقوليلي بوس إيد بابا، في الفرح هتقوليلي بوس رجلين بابا؟! المعازيم اتلمت، وبسيوني اتدخل وهدى الموضوع، ودخلوا القاعة، بس نادر كان متضايق جداً. في اليوم التالي: مصطفى قاعد مع فرغلي ودماغه مربوطة: فرغلي: أنا عملتلها محضر في القسم، ولازم تتربى! شمس تقبض مرتبها وتركب الأتوبيس، ونادر كمان يقبض مرتبه ويركب نفس الأتوبيس! واحد يجي وينشل شمس ونادر مع بعض! شمس تنزل ومش واخدة بالها، ونادر يصرخ: حراااامي! الناس تمسك الحرامي، والحرامي وهو بيجري كانت وقعت منه محفظة شمس، فنادر أخدها وحطها في جيبه ونسي يسلمها للظابط. شمس تروح البيت تكتشف إن المحفظة اتسرقت وفيها المرتب والبطاقة وتنهار. نادر في البيت يفتح محفظة شمس يلاقي صورتها ويبلم من جمالها، ويشوف اسمها في البطاقة: "شمس عبد الحافظ رجب"، ويقرر يرجعهالها. وفجأة، الباب يخبط عند شمس، تفتح تلاقي عسكري: مطلوب ضبط وإحضارك! الحلقة الرابعة العسكري ياخد شمس على القسم، وهناك تفتكر إنها مقبوض عليها عشان المحفظة، لحد ما يدخل خالها ويقولها إن فرغلي هو اللي عامل المحضر بسبب ضرب الفازة! فرغلي يساومها: يا نتجوز يا تكملي في الحبس! شمس توافق غصب عنها عشان تخرج، وفرغلي يتنازل عن المحضر. نيرة تكلم نادر وتبلغه إن والدها هيشغله في شركته بمرتب مضاعف. نادر يروح لعنوان شمس اللي في البطاقة عشان يرجعلها المحفظة، شمس تفتح الباب: نادر: مساء الخير، أنا جاي أرجعلك المحفظة بتاعتك، مش حضرتك آنسة شمس؟ شمس بغضب: أهلاً، هي المحفظة كانت معاك؟! طب خوووش! (وتديله بالبونية في عينه!). الحلقة الخامسة شمس قاعدة بتعمل كمادات تلج لنادر على عينه وهي محرجة وبتعتذر: حقك عليا، افتكرتك انت الحرامي! نادر يبتسم ويتعرفوا على بعض، ويعرف إنها شغالة سكرتيرة وهو مهندس كمبيوتر، ويمشي وهو معجب بيها وهي بتفكر فيه. فرغلي يتصل يطلب يقابلها ويهددها بالمحضر لو رفضت، فتضطر توافق. ماجد في الجامعة يضحك على سلمى ويقنعها يتجوزوا عرفي من ورا أهلها بورقتين، ويوعدها إنه هيتجوزها رسمي بعد التخرج، وسلمى تمضي وتاخد نسخة. نادر يروح يستلم شغله الجديد في شركة "بسيوني خليفة"، وبسيوني يدخل بيه على أوضة السكرتارية: بسيوني: رحبوا معايا بزميلكوا الجديد الباشمهندس نادر، وهو في الحقيقة خطيب بنتي وقريباً هيتم الزواج! شمس تبص لنادر بصدمة وحزن، ونادر يبصلها بضيق وإحراج. الحلقة السادسة شمس تحاول تتجاهل نادر في الشغل وتعامله بجفاء. نيرة تيجي الشركة وتدخل تحضن نادر قدام الموظفين، فشمس تعترض وتقول إن ده مكان شغل وميصحش، فتحصل مشادة بينهم ونيرة تهددها بالخصم. نادر يعاتب شمس، فشمس تعايره بإنه خطب بنت المدير عشان الفلوس، فنادر يدايق ويقولها إنه حر ومفيش حد مالي إيدها فبتطلع عقدهم عليه. شمس من غيظها تقرر تكلم فرغلي وتطلب منه يجي ياخدها من قدام الشركة عشان تغيظ نادر. فرغلي يجي، ونادر يفتكره والدها ويروح يسلم عليه، فيتفاجأ إن فرغلي بيقوله: أنا خطيبها! الحلقة السابعة نادر يتعصب ويقول لفرغلي: انت رايح تخطب واحدة قد بنتك؟! فرغلي يمسك إيد شمس بعنف، فنادر ينزل فيه ضرب عشان يدافع عنها. شمس تصرخ وتمشي، ونادر يجري وراها ويعتذرلها، ويطلب منها يشيلوا الألقاب ويتكلموا كأصحاب، وتحكيله قصة ابتزاز فرغلي ليها، فنادر يوعدها إنه هيتصرف ويخلصها منه. نادر يطلب منها تعزم فرغلي في بيتها تاني يوم، وهو هيجي وينهي الموضوع. سلمى ترجع متأخرة وشمس تزعق معاها وتخاف عليها، وسلمى تبرر بزحمة المواصلات. الحلقة الثامنة شمس تروح الشغل لابسة طقم شيك، فنادر يعجب بيها ويغير عليها من نظرات الموظفين. المدير بسيوني يطلب شمس ونادر في مكتبه: يعلن عن مناقصة كبيرة، ويسلم أظرف العطاء المقفولة لشمس تشيلها في درج مكتبها لحد ميعاد الفتح، ويطلب نادر في موضوع تاني يخص كتب كتابه على نيرة. شمس ونادر كل واحد يداري مشاعره وغيرته. بالليل، فرغلي يروح بيت شمس، ونادر يوصل ومعاه ورق رسمي. الحلقة التاسعة نادر يواجه فرغلي قدام شمس وخالها بالورق: البيه مش دكتور، ده معاه دبلوم تمريض وبيمارس الطب بدون ترخيص، ويهدده بتسليم الورق للنيابة لو مقفلش المحضر وبعد عن شمس نهائياً. فرغلي يترعب ويتنازل ويهرب. شمس تشكر نادر وتفرح، بس يجيله اتصال من نيرة فيضطر يمشي، وشمس تحزن. في الشغل بعد أسبوع، يوصل آخر ظرف عطاء من الشركات المنافسة، وشمس تشيله في الدرج. نيرة تقنع والدها إن شمس مش مريحة، وبسيوني يدافع عن كفاءتها ويقول إنه مأمنها على أظرف العطاء. نيرة تسمع وتخطط لمكيدة تخلص بيها من شمس. سلمى في البيت يجيلها غثيان وترجيع مفاجئ. الحلقة العاشرة شمس تقلق على سلمى وتفتكر إنها واخدة برد في معدتها. نادر يكلم شمس ويطلب يقابلها بعد الشغل عشان يصارحها بحبه، وشمس توافق وهي طايرة من الفرحة. تاني يوم بعد الشغل، نادر يقابل شمس ويقولها: شمس أنا بحب... وقبل ما يكمل، عربية تيجي بسرعة ناحية شمس! الحلقة الحادية عشر نادر يصرخ ويزق شمس وينقذها ويقعوا في الشارع والناس تتلم. نيرة تظهر فجأة وتتريق عليهم وتاخد نادر معاها بجفاء، وشمس تمشي مكسورة وتعيط. نادر يتخانق مع نيرة ويقفل تليفونه، ويحاول يكلم شمس فتكسر موبايلها من الغيظ. شمس تروح فرح رنا وهي متألقة، تلاقي شخص جاي من وراها ويقول: تسمحيلي أقعد معاكي يا شمس؟ تلتفت تلاقيه نادر! الحلقة الثانية عشر نادر يقعد معاها، ورنا تكون هي اللي دبرت حضورهم سوا عشان تقربهم. نيرة تتصل بنادر وتطلب منه يسيب الفرح، فيرفض ويقفل في وشها، فنيرة تتوعد بالانتقام. زميلهم أكرم يروح الفرح ويقعد مع شمس، ونادر يغلي من الغيرة. في البيت، سلمى يغمى عليها، ورضوى تستنجد بخالها مصطفى، ويجيبوا دكتور يكشف عليها. الدكتور يخرج ويصدمهم: المريضة حامل! الحلقة الثالثة عشر مصطفي ورضوى يتصدموا، ومصطفى يواجه سلمى، فتعترف إنها اتجوزت زميلها ماجد عرفي ومعاها نسخة من الورقة، وكانوا متفقين يعلنوا بعد التخرج. مصطفى يقرر يخبي على شمس مؤقتاً لحد ما يجبروا ماجد يتجوزها رسمي. نادر يوصل شمس بعد الفرح بعربيته في صمت وتوتر. بعد أسبوع في الشركة، تقوم كارثة: أظرف العطاء اتسربت والشركات اشتكت! بسيوني يدخل ويزعق ويتهم شمس بخيانة الأمانة وقبول رشوة، لأن مفاتيح الدرج معاها هي بس، ويطردها من الشركة ويفصلها! شمس تنهار وتحلف إنها بريئة، والكل يبصلها باتهام. نادر يتصدم فيها ويقولها: مكنتش اتصور إنك رخيصة كده! شمس تضربه بالقلم: اخرس، انت اللي رخيص وجريت ورا الفلوس، وبكرة الكل يتأكد من براءتي! أكرم يخرج وراها ويطبطب عليها ويقولها إنه مصدقها. الحلقة الرابعة عشر شمس تروح البيت وتبكي بحرقة ومتقولش لإخواتها إنها اترفدت. نادر يقف يلوم نفسه ويندم إنه شك فيها ويدرك إنه بيحبها بجد. سلمى تتصل بماجد وتبلغه إنها حامل، فماجد يتهرب ويقولها: بعد التخرج بأسبوع، والورقة اللي معاكي بليها واشربي ميتها! الساعة 7 بالليل، أكرم يروح لشمس في البيت ويطلب إيدها للجواز فجأة! الحلقة الخامسة عشر أكرم: شمس تتجوزيني؟ شمس ترفض في الأول بسبب ظروفها، بس أكرم يصر، وشمس تقرر توافق بشرط إنه يساعدها تثبت براءتها وتنتقم من اللي دبرلها المكيدة، وأكرم يوافق. مصطفى يوافق ويحددوا الخطوبة، وشمس تستلف منه فلوس بعد ما حكتله على رفدها. الجمعة تتم خطوبة شمس وأكرم، وشمس حزينة طول الوقت بس بتجبر خاطر أكرم عشان صدقها. نادر يعرف بالخطوبة في الشغل ويتصدم ويتعصب جداً. الحلقة السادسة عشر نادر يواجه أكرم بغضب، وأكرم يقوله: أنا بحبها وهتجوزها وانت مالكش دعوة. أكرم يجيب لشمس شغل في شركة كمبيوتر تانية، وشمس تشكره. نادر يرجع البيت يفرغ غضبه في إخوته، وبالليل يروح بيت شمس الساعة 11 بالليل ويشدها من إيدها بعصبية: انتي اتخطبتي لأكرم ليه؟! شمس تقوله إنها حرة وتطرده برة البيت. ماجد يتخرج من الكلية، وسلمى تتصل تباركله فيرد باستهبال: أنا مش متجوزك وماعرفكيش! ويقفل السكة في وشها. سلمى تنهار ويغمى عليها. سارة زميلة سلمى تتصل على تليفون سلمى، فترد شمس، وسارة تسأل: هي سلمى مبتحضرش بقالها شهر ليه والعميد فصلها؟! شمس تسمع وتتصدم صدمة عمرها. الحلقة السابعة عشر شمس تواجه سلمى وتضربها، فسلمى تصرخ: أنا حامل! مصطفى ورضوى يدخلوا ويحكوا لشمس القصة كاملة، وإن ماجد هرب وغير رقمه ومش معترف بالورقة ولا بالجنين. شمس تسأل عن اسمه، فيقولوا: "ماجد محمود يحيى". شمس تقرر تدور عليه في كل مكان عشان يجبروه يتجوزها رسمي. في نفس الوقت في الشركة، نادر بالصدفة يسمع أكرم بيتكلم في التليفون: إنه نفذ المطلوب وطير شمس من الشركة وأخد 50 ألف جنيه من شركة مصلحي شعلان، وشغلها في شركة بعيدة عشان تبعد عن سكة نادر وتوافق تتجوزه هو! نادر يتصدم ويراقب أكرم بالعربية لحد كافيه... ويتفاجأ إن اللي قاعدة مع أكرم وبتحاسبه هي: نيرة! الحلقة الثامنة عشر نادر يسمع نيرة وهي بتقول لأكرم إن المكيدة نجحت وشمس بعدت عن نادر وأكرم خطبها، وإن كتب كتابها على نادر كمان يومين. نادر يحس بندم فظيع وقهر إنه ظلم شمس، ويقرر يفركش الجوازة ويكشف الحقيقة. نادر يراقب شمس ويستناها لما تخرج من المطعم مع أكرم، ويشدها في عربيته بالعافية عشان يحكيلها، ويقولها: أكرم هو اللي سرب العطاء بالاتفاق مع نيرة عشان تترفدي ويجبرك ترتبطي بيه! شمس تتصدم وترفض تصدقه وتفتكره بيتبلى عليه وسكران، وترش المية في وشه. نادر يمسك وشها ويصرخ: عشان بحبك يا شمس!! وقبل ما تستوعب، العربية تخبط في شجرة وتعمل حادثة! الحلقة التاسعة عشر نادر يفوق ويلاقي شمس مجروحة ومغمى عليها، ينقلها المستشفى بسرعة ويفضل جنبها لحد ما تفوق. شمس تفوق وتكمل خناق معاه وتتهمه إنه عايز يخرب بيتها، والدكتور يدخل ويطمنهم إنها كدمات بسيطة. وهما مروحين في الشارع شباب يعاكسوها، فنادر يضربهم ويحميها ويوصلها لبيتها في تاكسي. أكرم يكون قالب الدنيا عليها ومستنيها تحت بيتها، يشوفها نازلة مع نادر ودماغها مربوطة، فيتخانق مع نادر والاتنين يضربوا بعض، وشمس تحوش بينهم. شمس تطلع البيت وتفتكر كلام نادر والشك يدخل قلبها. سلمى تتوحم على بطيخ في غير أوانه، ومصطفى وشمس يحتاسوا. نادر يسهر طول الليل يدور على خطة يوقع بيها أكرم ويقنع شمس. الحلقة العشرون نادر يطلب مساعدة رنا في الشغل ويحكيلها، ورنا تصدقه وتقوله إن شمس مبتحبش أكرم وكانت بتغيظك بس. نادر يرفض يتمم كتب كتابه على نيرة. رنا تراقب أكرم وتعرف إنه هيقابل مصلحي شعلان يوم الإثنين الساعة 6 عشان يستلم 50 ألف تانية. رنا تبلغ نادر، ونادر يبلغ المدير بسيوني باللعبة كلها عشان يثبت براءة شمس بدون ما يجرجر اسم بنته في الفضيحة، ويتفقوا يبلغوا الشرطة تنصب كمين لأكرم. شمس ومصطفى يروحوا للعميد ويعملوا إعادة قيد لسلمى بعد ترجي. الحلقة الواحدة والعشرون يوم كتب كتاب نادر ونيرة، المعازيم متجمعين والمأذون قاعد. البواب يخبط ويسلم نيرة جواب فيه دبلتها ورسالة من نادر يرفض فيها الجوازة ويفضح أخلاقها ومؤامرتها ضد شمس. نيرة تنهار وتعيط، وبسيوني يعرف الحقيقة. نادر يروح الشركة ويقدم استقالته رسمي، وبسيوني يساعده في الإيقاع بأكرم. شمس تحكي لرنا على حمل سلمى وموضوع أكرم، ورنا تهديها وتقولها تصبر لحد ما الحقيقة تبان. الحلقة الثانية والعشرون أكرم يستلم الفلوس من مصلحي شعلان، ويطلع يجري على بيت شمس بالشنطة عشان يفاجئها بالمهر. شمس تفتح، وأكرم يفتح الشنطة، فشمس تواجهه وتقوله إنها كشفته وعرفت إنه مرتشي وتطرده. أكرم يهجم عليها ويحاول يعتدي عليها، فشمس تصرخ. نادر يكسر الباب ويدخل يضرب أكرم ضرب مبرح، والشرطة تدخل وراه وتقبض على أكرم متلبس بالرشوة! نادر ورنا يفهموا شمس الخطة كلها، وإن كتب كتابه على نيرة متلغاش بس، ده متمش أصلاً! تاني يوم، نادر يقابل شمس في كافيه ويعترفلها بحبه، وياخد ميكروفون في الشارع ويصرخ بحبها قدام الناس، فشمس تعترف بحبها ليه وتوافق يتخطبوا، ويتفقوا يقابل خالها تاني يوم. الحلقة الثالثة والعشرون نادر يروح يخطب شمس هو وإخوته ماجد ومعتز. ماجد يرن جرس الباب فيتكهرب ويقع ويودوه المستشفى ويتأجل الميعاد لليوم اللي بعده. تاني يوم، نادر وماجد ومعتز يروحوا، ومصطفى يقعد معاهم ويقروا الفاتحة ويلبسوا الدبل، وسلمى مكنتش موجودة عشان كانت بتذاكر عند صاحبتها. شمس تفرح وتبارك لنادر. الحلقة الرابعة والعشرون نادر يبعت هدية لشمس: إسورة فضة وكارت فيه اسمه: "نادر محمود يحيى"، وسافر إسكندرية مع إخوته يومين. مصطفى يجيب لشمس عنوان ورقم تليفون ماجد اللي ضحك على سلمى: الدور الرابع شقة 2 في نفس عمارة نادر، ونفس الرقم الأرضي! نادر يبعت صورته مع إخوته على البحر لشمس، فسلمى تشوف الصورة وتصرخ: ماجد اللي في الصورة جنب نادر هو اللي اتجوزني وحامل منه!! شمس تكتشف إن ماجد هو أخو نادر، وتنهار وتقرر إن جوازها من نادر مستحيل يتم على حساب ألم أختها، وتطلب تقابل نادر فور رجوعه. الحلقة الخامسة والعشرون نادر يروح لشمس، فشمس تحط ورقة الجواز العرفي في وشه وتتهم أخوه. نادر يقرا الورقة ويتصدم، بس يقولها بثقة: دي مش إمضاء ماجد!! شمس تزعق وتفتكره بيدافع عن أخوه وتطرده. نادر يرجع البيت ويفتش في تليفون ماجد يلاقي رقم سلمى متسجل. تاني يوم نادر يروح يقعد مع سلمى ويفهم التفاصيل، ويكتشف إن ماجد جابلها الورقتين ممضيين جاهزين. نادر يرجع يفتش في دولاب ماجد ويلاقي النسخة التانية من ورقة الجواز العرفي، ومعتز يدخل عليه ويكشفله السر: ماجد جاب صاحبه هشام وإداله 200 جنيه عشان يمضي بداله باسم ماجد على الورقتين عشان يفلت من المسؤولية! الحلقة السادسة والعشرون والأخيرة نادر يواجه ماجد بالورقة والسر، ويضربه بالقلم، ويسجل اعترافه بصوته ويبعته لشمس، ويهدده بتسليم التسجيل للنيابة أو الجواز من سلمى وسترها رسمي. ماجد يوافق مضطراً، ونادر يجيب المأذون وصاحبه عمرو شاهد، ويكتبوا كتاب ماجد وسلمى في بيت شمس رسمي. أول ما المأذون يخلص، ماجد يبص لسلمى ويقول ببرود: "انتي طالق!" ويمشي. شمس تنهار وتلوم نادر وتعتبره متفق مع أخوه، وتقلعلة الدبلة والإسورة وتقوله: موضوعنا انتهى ومستحيل أعيش سعيدة على كرامة أختي المهدورة، وتطرده. يمر شهر، وماجد يعترف لنفسه ولنادر إنه ندمان وبيحب سلمى ومش قادر يعيش من غيرها ولا يطلقها رسمي عند المأذون وعايز يرجعلها ويعملها فرح ويعيشوا سوا مع ابنهم. نادر وماجد يتفقوا مع الخال مصطفى، ومصطفى يدخل على شمس وسلمى ويقولهم جايب عريس لسلمى وعريس لشمس! يدخل نادر ومعاه ماجد، وماجد يعتذر لسلمى بدموع ويعترف بحبه ليها وطلب ردها وتسامحه، وسلمى توافق. ونادر يعتذر لشمس ويصالحها، وشمس تعترف بحبها ليه وتسامحه، والزغاريد تملا البيت. بعد أسبوعين، يتعمل فرح كبير لماجد وسلمى، ونادر وشمس واقفين جنبهم فرحانين ومتفقين على جوازهم في جو من السعادة والحب. تمت الرواية بحمد الله.