رجعتلك يا بابا وانا مطلقه وهو متجوز عليا وطاردني من بيتي وجايب واحده اكبر مني

رجعتلك يا بابا وانا مطلقه وهو متجوز عليا وطاردني من بيتي وجايب واحده اكبر مني وقدي مرتين ومنيمها في اوضتي وعلى فرشتي بكل جبروت

طردني حتى من غير ما يديني حجاب البسه على راسي بلبس البيت وشحتت حجاب من جارتنا اللي جنبي وشبشب علشان اعرف اجي لكم

شفت يا بابا انا وصلت نفسي لايه !

قالت الكلام ده وفضلت ټعيط جامد وتشهق من العياط وابوها اټصدم من الكلام اللي نزل على قلبه زي الصاعقه وامها طبعا ما قدرتش تشوف دموعها واخذتها في حضنها وقالت لها وهي بتطبطب على ضهرها

يا حبيبه امك يا ضنايا يا بنتي ده انت اتوجعتي وما كنتيش بتتكلمي وبعتي دهبك كله علشان تاكلي وتشربي وما تكلمتيش

وانضربتي واتهنتي وما تكلمتيش ولا جيتي فضفضتي لامك يا حبيبتي

ونزلتي تشتغلي مش زي ما كنت بتقولي عشان تتسلي لا علشان تاكلي نفسك وتشربي نفسك وتعلفي اللي كان عايش معاكي و كل ده مستحملاه وما تكلمتيش بس يا حبيبتي هدي اعصابك ما تعيطيش .

اما ابوها في عالم تاني خالص مش زعلان على طلاقها لا زعلان على بنته ونور عينه اللي اتهانت وانضربت وجاعت وانطردت

وبنته شافته ما تكلمتش ومسهم وفكرت ان هو متضايق علشان هي اتطلقت فقالت له بۏجع

لو انت متضايق يا بابا ان انا اطلقت ورجعت لك انا ممكن ارجع اعيش معاه واستحمل علشان ادفع ضريبه اختياري .

راح عليها ابوها واخدها في حضنه وطبطب عليها جامد لما وصل لها احساس ان ابوها زعلان انها اتطلقت وقال لها بيشدد على حضنها باحتواء

حبيبه ابوكي ده انت ربنا نجاكي من المرار اللي إنتي كنتي عايشه فيه مع المتخلف ده

هو انت فكرك ان انا ممكن اسيبك ترجعي للي ما يسواش تعريفه في سوق الرجاله ده والله ما بقاش راجل وشنبي ده على وشي اما جبت لك حقك منه تالت ومتلت .

قال لها الكلمتين دول وخرج من البيت راح على بيت عمرو وابوه

واول ما وصل قدام بيتهم كانت الجيران قاعدين في الشارع على صوته في الشارع وقال

يا حاج ابو عمرو يا راجل يا كبير يا اللي بتفهم في الاصول اخرج لي هنا في الشارع كده قدام الناس دي كلها ونتكلم عيانا بيانا

قال الكلمتين دول وكان معلي صوته والناس كلها انتبهت وفورا خرج ابو عمرو ومراته ومسكوه من ايديه وحاولوا يدخلوه علشان يتكلموا جوه مش قدام الناس لكن هو نفض ايديهم الاثنين وكمل بصوت عالي قدام الناس