مصيبه في بيتي حكايات زهرة الربيع
أنا سبت بيت جوزي وكنت هتطلق عشان الحشرات، كنت ألاقي فيران وصراصير ونمل وغيره بصورة عجيبة، والأسوء ظهور العقارب والأفاعي، عملت المستحيل عقمت وجبت مبيدات غالية وروحت للمشايخ وحصنت البيت بس مفيش فايدة، كنت فاكرة حياتي باظت كده لحد ما جات خالة جوزي من البلد وهية الوحيدة اللي كشفت سبب المشكلة وعرفت تحلها في يومين!!
من أول ما اتجوزت وأنا مش شايلة أي هم، حياتي كانت هادية ومستقرة مع جوزي وربنا رزقني بولد وبنت زي القمر، لحد ما فجأة… كل حاجة اتقلبت.
البداية كانت بسيطة بس مستفزة، نمل! بس مش أي نمل، نمل بكثافة رهيبة ومنتشر في كل شبر. أقسم بالله كنت أفتح أكياس الرز والسكر المقفولة ألاقي النمل جواه! أفتح الدولاب ألاقيه مالي الهدوم. قلت عادي، رشيت بودرة ومبيدات، بس بعد كده… !
الموضوع اتطور بشكل يجنن العقل. فجأة وبدون أي مقدمات، الصراصير بقت تطلعلي من تحت الأرض، وحجمها يخوف. وبعدها الفيران! بقت تطلع من كل حته في البيت بطريقة مقرفة وتقشعر البدن، أدخل المطبخ ألاقي فار واقف على الرخامة، أفتح الحمام ألاقي فار طالعلي من البانيو! أنا وجوزي كنا هنتهبل، أنا ست بيت غاوية نظافة، بيتي ده كان منظره يشرح القلب، وشقة متشطبة لوكس على أحدث طراز، مفيش خرم ولا حتة مفتوحة، وعمري ما سبت مواعين في الحوض ولا حتة زبالة بايتة، الحاجات دي بتدخل منين وبيجو بالسرعة والكثرة دي إزاي؟!
عملت كل اللي يتخيله عقل. جبت أغلى المبيدات من الصيدليات، وجبت أدوات صيد وأشكال وألوان من المصايد، وكلمت أكبر شركات رش الحشرات… يجوا يرشوا الشقة بكيماويات تخنق، وأعمل دورة نظافة كاملة وأعقم البيت بأسطول ديتول وكلور، ويادوب الشركة تمشي من هنا، ونفس القرف يرجع ألعن من الأول!
ولحد هنا وكانت عيشتنا جحيم، بس اللي جاي كان كابوس بجد…
في يوم داخلة أوضة أطفالي بالليل، ألمح حاجة سودا بتتحرك جنب السرير، بأيد النور لقيت عقرب سجين ورافع ديله! أنا صرخت صرخة جابت العمارة كلها. وبعدها بيومين ألاقي أفعى صغيرة ملفوفة تحت كنبة الصالة! عيالي بقوا يترعبوا ومابيناموش، البنت والولد حالة الهلع سكنتهم، والبيت بقى بيئة جحيم ورعب، مبقتش قادرة أقف على رجلي ولا آكل ولا أشرب.